İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 352 Hüküm no: 342 Orijinal metin no: [88b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Musa’nın Dellâl Ali Beşe ile olan davasında eski İzmir kadısı Seyyid Mehmed Efendi’nin çukadârı Mehmed Beşe’nin arabuluculuk için haksız yere aldığı para konusunda sulh sağlandığı Husûs-ı âti’l-beyânın mahallinde tahrîr iltimâs olunmağın şerî‘at-ı mergūbeden Mevlânâ el-Hâc Hasan Efendi b. el-Hâc Mehmed irsâl olunup ol dahi mahmiye-i İstanbul’da el-Hâc Ferhad mahallesinde sâkin vilâyet-i Anadolu’da sâbıkan medîne-i İzmir kadısı olan a‘lemü’l-ulemâ’i’l-izâm zübdetü’l-fuzalâ’i’l-fihâm Fenârîzâde es-Seyyid Mehmed Efendi hazretlerinin sa‘âdet-hânelerine varıp zeyl-i vesîkada mastûrü’l-esâmî müslimîn huzûrunda akd-i meclis-i şer‘-i hatîr eyledikde medîne-i mezbûre mahallâtından Yenimahalle ahâlîsinden olup mahmiye merkūmede Sultan Selim kurbunda Mustafa Paşa mahallesinde bi tarîki’l-müsâfere sâkin el-Hâc İbrahim b. Musa nâm kimesne meclis-i ma‘kūd-ı mezbûrda, mûmâ-ileyh es-Seyyid Mehmed Efendi ve çukadârları olan Mehmed Beşe b. Ahmed mahzarlarında ikrâr-ı tâm ve takrîr-i kelâm edip mûmâ-ileyh es-Seyyid Mehmed Efendi’nin hîn-i kazâsında medîne-i merkūme ahâlîsinden ve Dellâl Ali Beşe [nâm] kimesne ile bir husûsa müte‘allika da‘vâm olmağın mezbûr Mehmed Beşe beyninizi ıslâh edeyim deyû medîne-i mezbûre ahâlîsinden Yaycızâde Mehmed Efendi yediyle iki yüz guruş, cem‘an üç yüz guruşumu bi gayr-ı vech ahz u kabz eylediler deyû taleb ve da‘vâ ve bi tarîki’l-inkâr edip beynimizde münâza‘ât-ı kesîre ve muhâsamât-ı şedîde cereyânından sonra el-hâletü hâzihî beynimizde muslihûn tavassut edip mûmâ-ileyh es-Seyyid Mehmed Efendi mezbûr Mehmed Beşe da‘vâ-yı mezbûremden beni otuz kıt‘a esedî guruşa inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz guruşu yedlerinden bi’t-tamâm ve’l-kemâl ahz u kabz eyledim ba‘de’l-yevm husûs-ı mezbûra müte‘allika cemî‘ de‘âvî ve mütâlebâtdan mûmâ-ileyh es-Seyyid Mehmed Efendi mezbûr Mehmed Beşe’nin zimmetlerin ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Veli b. Halil nâm kimesne ile meclis-i şer‘a gelip alâ vukū‘ihi inhâ ve takrîr-i kelâm etmeğin mâ vaka‘a bi’t-taleb ketb olundu. Fi’l-yevmi’l-âşir min şehri Rebî‘ilevvel li sene seb‘a ve semânîn ve elf. Şuhûdü’l-hâl: Umdetü’l-müderrisînü’l-kirâm [ve’l-] muhakkikīni’l-fihâm Fenârîzâde es-Seyyid Mehmed Efendi, fahrü’l-kuzât Ahmed Efendi b. Abdülkerim Efendi, Hüseyin Efendi b. Babil?, Seyyid Halil Nakîb-i Kütahya sâbıkan, Fazlı Efendi b. Süleyman ve gayruhüm mine’l-hâzırîn.