İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 354 Hüküm no: 344 Orijinal metin no: [89a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Ağa b. Gıyabeddin’in el-Hâc Ahmed Ağa b. Hasan ile anlaşarak ev satış işlemini iptal ettiği ve parasını geri aldığı Mahrûse-i Üsküdar’da Hâce Hâtun mahallesi sâkinlerinden İbrahim Ağa b. Gıyaseddin nâm kimesne meclis-i şer‘-i şerîf-i lâzımü’t-teşrîfde, fahrü’l-akrân bâ‘is-i hâze’l-kitâb el-Hâc Ahmed Ağa b. Hasan nâm kimesne mahzarında ikrâr ve takrîr-i kelâm edip merkūm el-Hâc Ahmed Ağa bin seksen beş senesi Şevvâli’nin yedinci günü yedinde mülkü olup mahalle-i mezbûrede vâki‘ bir tarafdan el-Hâc Mehmed Odabaşı mülkü ve bir tarafdan Yusuf bin Abdullah mülkü ve bir tarafdan tarîk-i hâs ve bir tarafdan tarîk-i âm ile mahdûd, fevkānî dört bâb oda ve tahtânî dört bâb oda ve bir tahtapûş ve bir kiler ve ahır ve kenîfi ve iki bi’r-i mâyı ve bir mikdâr havluyu müştemil menzilini bi cümleti’t-tevâbi‘ ve’l-levâhık iki yüz yirmi guruşa bana bey‘ ve teslîm ben dahi ba‘de’l-iştirâ ve’t-tesellüm semen-i mezbûru merkūm el-Hâc Ahmed Ağa’ya edâ ve teslîm ol dahi ahz u kabz ettiğinden sonra târih-i kitâbdan bir ay [89b] mukaddem rızâmızla bey‘-i mezbûru merkūm el-Hâc Ahmed Ağa ile fesh ve ikāle edip menzil-i mezbûru merkūm el-Hâc Ahmed Ağa’ya teslîm ol dahi kabz ve tesellümetmiş idi hâlâ semen-i mezbûr iki yüz yirmi guruşu merkūm el-Hâc Ahmed Ağa bana edâ ve teslîm ben dahi yedinden ahz u kabz edip husûs-ı mezbûra müte‘allika da‘vâdan merkūm el-Hâc Ahmed Ağa’nın zimmetini ibrâ ve iskāt eyledim dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’l-âşir min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Efendi imâm-ı mahalle-i Fîrûz Ağa, el-Hâc Şaban b. ( ), Mahmud Çelebi b. ( ), Hüseyin Beşe b. ( ), İsâ Çelebi b. ( ), Yusuf Beşe b. ( ), Mehmed Çelebi b. Abdullah, İbrahim Çelebi b. Mehmed, Hüseyin b. Ebûbekir.