İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 358 Hüküm no: 347 Orijinal metin no: [90b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Ali Çavuş’un Mehmed Ağa b. Sinan’a borcuna karşılık rehin verdiği evin, satılarak borcunun ödenmesi Mahmiye-i İstanbul’da Kızıltaş mahallesi sâkinlerinden fahrü’l-akrân bâ‘is-i hâze’l-kitâb Mehmed Ağa b. Sinan nâm kimesne meclis-i şer‘-i şerîfde takrîr-i kelâm ve ta‘bîr ani’l-merâm edip mezbûr Osman Paşa’nın hazînedârı yeniçeri çavuşlarından oldukdan sonra mahmiye-i mezbûrede Çıkrıkçı Kemal mahallesi sâkinlerinden iken bundan akdem vefât eden Ali Çavuş nâm kimesne bin yetmiş sekiz senesi şehri Ramazânın üçüncü günü yedimden? iştirâ ve kabz eylediği iki bin dört yüz top çadır bezi bahâlarından zimmetinde hakkım olan üç bin guruş mukābelesinde yedinde mülk olup zikr olunan Çıkrıkçı Kemal mahallesinde vâki‘ bir tarafından Ömer Beşe mülkü ve bir tarafdan tarîk-i âm ve iki tarafdan müte’ehhilîn odaları ile mahdûd büyût-ı adîdeyi müştemil menzilini bana rehin vaz‘ ve teslîm ben dahi irtihân ve tesellüm ettiğimden sonra kable edâi’d-deyn ve fekki’r-rehin mezbûr Ali Çavuş vefât edip bin seksen altı senesi Muharremi gurresinde Mahmud Paşa nâibi olan Abdülhalim Efendi huzûrunda tarafımdan vekîlim olan Sunullah Efendi nâm kimesne müteveffâ-yı mezbûr Osman Paşa’nın yedinde rehin olmak üzre menzil-i mezbûra vâzı‘atü’l-yed olan zevcesi Havvâ bt. Mehmed Ağa nâm hâtun tarafından vekîl-i sâbitü’l-vekâlesi Emine bt. Mehmed nâm hâtun ile terekesinin sülüs-i erbâ‘ı beytülmâle âid olmağla kezâlik vâzı‘ü’l-yed olan defterdâr kāimmakāmı olan Hasan Efendi tarafından bâ‘isü’l-vekâle vekîl olan Hasan Ağa b. Hamza mahzarlarında menzil-i mezbûr müteveffâ-yı mezbûr Osman Paşa’dan mukaddem benim yedimde rehin olduğunu şuhûd-ı udûl ile isbât dahi edip mûcebince hükm-i şer‘î lâhık olmuş idi hâlâ menzil-i mezbûr bin yetmiş sekiz senesinden beri yedimde rehin olup müteveffâ-yı mezbûr Ali Çavuş’un hasren vârisleri olan zevcesi Ümmühâni Hâtun ile karındaşı oğlu Yusuf Ağa nâm kimesne dahi gaybet-i münkatı‘a ile gāibler olmağla [91a] menzil-i mezbûr semen-i misli ile bey‘ ve kabz ve sümün semeninden meblağ-ı mezbûr üç bin guruş hakkımı istîfâya, fazla kalırsa yedimde hıfza taraf-ı şer‘den bana izin verilmek matlûbumdur dedikde kaziyye minvâl-i muharrer üzre olup menzil-i mezbûr merkūm Mehmed Ağa yedinde rehin olup müteveffâ-yı mezbûrun vârisleri dahi gaybet-i münkatı‘a ile gāibler olduğu zeyl-i vesîkada muharrerü’l-esâmî olan müslimîn ihbârlarıyla müte‘ayyin olup ve Fetâvâ-yı Bezzâziyye’de dahi el-münyetü li’l-mürtehin bey‘i’r-rehni bi icâzeti’l-hâkimi ve ahaze deynehu inkâne’r-râhin gāiben lâ-yu‘rafu mevtühü ve hayâtühü deyû tasrîh olunmağın mûmâ-ileyh Mehmed Ağa’ya menzil-i mezbûru semen-i misli ile ba‘de’l-bey‘ deyn-i merkūm istîfâ ve fazlasın vâris için hıfza taraf-ı şer‘den ber vech-i muharrer izin verilip mâ vaka‘a bi’t-taleb ketb olundu. Fî selh-i Saferi’l-hayr sene seb‘a ve semânîn ve elf. Şuhûdü’l-hâl: Fahrü’l-akrân el-Hâc Kemaleddin Ağa Kethüdâ-yı Hazret-i Efendi, Mehmed Efendi b. Mehmed, Abdurrahman Efendi b. Hüseyin, el-Hâc Hüseyin Ağa b. Üveys, Veli Beşe b. Mahmud ve gayruhüm.