İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 359 Hüküm no: 348 Orijinal metin no: [91a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun’un babası Receb Bey b. Veli ile büyükannesi Turbula bt. Abdullah’tan alacağı olduğunu ispat edemediği Mahmiye-i İstanbul’da Hocapaşa kurbunda Karaki mahallesi sâkinlerinden iken bundan akdem vefât eden Mustafa nâm kimesnenin verâseti, zevce-i metrûkesi Ayşe nâm hâtuna ve sulbiye kızları Fâtıma ve Havvâ’ya münhasıra olup ba‘dehu mezbûre Havvâ dahi vefât edip verâseti, vâlidesi mezbûre Ayşe’ye ve li ebeveyn kız karındaşı mezbûre Fâtıma’ya münhasıra olup ba‘dehu mezbûre Fâtıma dahi vefât edip verâseti, vâlidesi mezbûre Ayşe’ye münhasıra olduğu şer‘an müte‘ayyin oldukdan sonra mezbûre Ayşe dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde babası bâ‘is-i hâze’l-kitâb Receb Bey b. Veli nâm kimesne ile büyük vâlidesi Turbula bt. Abdullah nâm Hâtun mahzarlarında üzerlerine da‘vâ ve takrîr-i kelâm edip zevcim mezbûr Mustafa târih-i kitâbdan sekiz sene mukaddem fevt oldukda terekesinden babam mezbûr Receb Bey beş yüz guruş bi tarîki’l-emâne ahz u kabz edip hattâ ikrâr dahi ettiğinden sonra meblağ-ı mezbûrun iki yüz guruşunu bana def‘ ve teslîm ben dahi ba‘de’l-ahz büyük vâlidem Turbula’ya bi tarîki’l-vedî‘a def‘ ve teslîm ol dahi ahz u kabz edip meblağ-ı mezbûr beş yüz guruşun üç yüz guruşu babam mezbûr Receb Bey yedinde kalıp ve iki yüz guruşu vâlide-i mezbûre Turbula yedinde kalmış idi hâlâ mezbûrân Turbula ve Receb Bey’e suâl olunup meblağ-ı mezbûr bana teslîmi tenbîh olunmak matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Receb Bey’e müteveffâ-yı mezbûrun terekesinden meblağ-ı mezbûr beş yüz guruşu ber vech-i muharrer ahz u kabz etmeyip ve mezbûre Turbula’ya meblağ-ı mezbûrun terekesinden meblağ-ı mezbûr beş yüz guruşu ber vech-i muharrer ahz u kabz etmeyip ve mezbûre Turbula’ya meblağ-ı mezbûr iki yüz guruşu müdde‘iye-i mezbûre yedinden vech-i muharrer üzre ahz u kabz etmeyip? üzerlerine redd-i zamândan bir nesne lâzım olmadığına yemîn teklîf olundukda anlardan her biri dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘iye-i mezbûre bilâ-beyyine ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’t-tâsi‘ min şehri Rebî‘ilevvel li sene seb‘a ve semânîn ve elf. Şuhûdü’l-hâl: Kıdvetü erbâbü’t-tahrîr ve’l-kalem Hasan Efendi Tezkire-i ûlâ, Zübtedü ashâbü’t-tastîr ve’r-rakam Yusuf Efendi Tezkire-i sâniye, çavuşbaşı Murad Ağa, muhzır Kasım Ağa, Hasan Beşe Çukadâr ve gayruhüm mine’l-hâzırîn.