İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 360 Hüküm no: 349 Orijinal metin no: [91b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Mehmed’in Kadı Mehmed Efendi b. Abdülbâki ile alacak davasında anlaştıkları Vilâyet-i Anadolu’da Harmancık kazâsına tâbi‘ Erturanlar nâm karye ahâlîsinden Cafer b. Mehmed nâm kimesne meclis-i şer‘-i şerîfde bâ‘is-i hâze’l-kitâb Mehmed Efendi b. Abdülbâkī nâm kimesne mahzarında üzerine da‘vâ ve takrîr-i kelâm edip mezbûr Mehmed Efendi Uşşâkīzâde Efendi’nin vilâyet-i mezbûre nâibi iken bir husûsun temşiyyeti için bi gayri hakkın yedi esedî guruşumu ahz u kabzetmiş idin deyû mezbûr Mehmed Efendi’den bundan akdem da‘vâ ve taleb ettiğimde ol dahi inkâr etmekle beynimizde münâza‘ât-ı kesîre vukū‘undan sonra muslihûn tavassut edip mezbûr Mehmed Efendi ile beynimizde iki buçuk esedî guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki buçuk esedî guruşu yedinden tamâmen ahz u kabz eyledim ba‘de’l-yevm husûs-ı mezbûra müte‘allika âmme-i de‘âvâdan mezbûr Mehmed Efendi’nin zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selh-i Saferi’l-hayr li sene seb‘a ve semânîn ve elf. Şuhûdü’l-hâl: Nasûh b. İlyas, Hasan b. Sadık, İbrahim Çelebi b. Ahmed, Hüseyin Beşe b. Mustafa, Mehmed Çelebi b. İsmail ve gayruhüm.