İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 360 Hüküm no: 350 Orijinal metin no: [91b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Yusuf’un eşi Muhyiddin Efendi b. Ebûbekir’den muhâla‘a yoluyla boşandığı Mahmiye-i İstanbul’da Eski İmâret mahallesi sâkinelerinden Hatice bt. Yusuf nâm hâtun zâtı ma‘rifet-i şer‘iyye ile ârifân Şeyh Ali Efendi b. Mustafa ve Ahmed Efendi b. Mehmed nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde zevc-i dâhili bâ‘is-i hâze’l-kitâb Muhyiddin Efendi b. Ebûbekir nâm kimesne mahzarında ikrâr ve takrîr-i kelâm edip zevcim mezbûr Muhyiddin Efendi zimmetinde mütekarrir ve ma‘kūdun-aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Muhyiddin Efendi ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete müte‘allika âmme-i de‘âvâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman Çelebi b. Ömer, Veli Bey b. Mahmud, Ebûbekir b. Hüseyin, Mehmed b. Mehmed.