İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 361 Hüküm no: 351 Orijinal metin no: [91b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Halil ile boşandığı eşi İsmail Beşe b. Ebûbekir’in oğulları küçük yaştaki Mustafa’nın nafakası konusunda anlaştıkları Mahmiye-i İstanbul’da Keçeci Pîrî mahallesi sâkinelerinden Emine bt. Halil nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Yahya Beşe b. Ebûbekir ve İbrahim Çelebi b. Halil nâm kimesneler şehâdetleri ile şer‘an sâbit olan Süleyman Çavuş b. Mahmud nâm kimesne meclis-i şer‘-i şerîfde müvekkile-i mezbûrenin sâbıkan zevci olan bâ‘is-i hâze’l-kitâb İsmail Beşe b. Ebûbekir nâm kimesne mahzarında bi’l-vekâle ikrâr ve takrîr-i kelâm edip mezbûr İsmail Beşe müvekkilem mezbûre Emine’yi bundan akdem bâyinen tatlîk etmeğin mezbûr İsmail Beşe’nin firâşından hâsıl sadrî sagīr oğlu Mustafa’nın yevmî beş akçeden otuz altı ayda müctemi‘a olan beş bin yedi yüz akçe nafaka-i [92a] mefrûzasını vekâlet-i mahkiyem hasebiyle mezbûr İsmail Beşe’den da‘vâ ve taleb eylediğimde, ol dahi mezbûre Emine’yi bundan akdem ber vech-i muharrer tatlîk ettiğimden sonra zimmetimde mütekarrir ve ma‘kūdun-aleyh mehr-i müecceli olan bin beş yüz akçeyi ve oğlum sagīr-i mezbûrun vech-i muharrer üzre nafaka-yı mefrûzasını bin seksen üç senesi Zilhiccesi gurresinde mezbûre Emine benden da‘vâ ve taleb ettiğinde, beynimizde nizâ‘-ı küllî vukū‘undan sonra muslihûn tavassut edip mezbûre Emine ile beynimizde yirmi yedi esedî guruş üzerine inşâ-yı akd-i sulh eylediklerinde mezbûre Emine dahi sulh-ı mezbûru kabûl ve bedel-i sulh olan meblağ-ı mezbûr yirmi bir esedî guruşu yedimden tamâmen ahz u kabz edip mehr-i müecceli olan meblağ-ı mezbûre ve sagīr-i mezbûrun nafaka-i mefrûzasına müte‘allika âmme-i de‘âvî ve mütâlebâtdan zimmetimi ibrâ-i âm ile ibrâ ve iskāt ettiğinden sonra sagīr-i mezbûru yedi yaşına değin kendi malıyla infâk ve iksâya ta‘ahhüd ve iltizâm edip bundan akdem Bâb mahkemesinde nâibü’ş-şer‘ olan Ali Efendi b. Sinan’ın imzâsıyla mümzât ve hatmi ile mahtûme ve târih-i mezbûr ile müverraha ve mazmûnu takrîr-i meşrûhuna muvâfıka yedime hüccet-i şer‘iyye dahi vermiş idi deyû def‘le mukābele ve sagīr-i mezbûrun nafaka-i mefrûzası olan meblağ-ı mezbûru bana edâdan imtinâ‘ etmeğin beynimizde nizâ‘-ı küllî vukū‘undan sonra muslihûn tavassut edip mezbûr İsmail Beşe ile on esedî guruş üzerine inşâ-yı akd-i sulh eylediklerinde ben dahi bi’l-vekâle sulh-ı mezbûru kabûl ve bedel-i sulh olan meblağ-ı mezbûr on esedî guruşu mezbûr İsmail Beşe yedinden tamâmen ahz u kabz eylediğimden sonra sagīr-i mezbûrun nafaka-i mefrûzasına müte‘allika cemî‘ de‘âvî ve mütâlebâtdan bi’l-vekâle mezbûr İsmail Beşe’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î müvekkile-i mezbûrenin vâlidesi olup zâtı şâhidân-ı mezbûrân ta‘rîfleri ile mu‘arrefe olan Neslihan bt. Hüseyin nâm hâtun meclis-i mezkûrda merkūm İsmail Beşe muvâcehesinde ikrâr ve takrîr-i kelâm edip kızım mezbûre nefsini zevc-i âhara inkâh ve tezvîc etmekle sagīr-i mezbûrun hakk-ı hidânesi bana intikāl etmeğin müvekkile-i mezbûre nefsini zevc-i âhara tezvîc edeliden beri sagīr-i mezbûru kendi malım ile infâk ve iksâetmiş idim, hâlâ ben dahi sagīr-i mezbûrun nafaka ve kisvesine müte‘allika cemî‘ de‘âvâdan mezbûr İsmail Beşe’nin zimmetini ibrâ ve iskāt eylediğimden sonra sagīr-i mezbûru yedi yaşına varınca kendi malımdan infâk ve iksâya ta‘ahhüd ve iltizâm eyledim dedikde isre’t-tasdîki’l-mer‘î mâ vaka‘a bi’t-taleb ketb olundu. Fi’l-yevmi’s-sâlis aşer min Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Veli Beşe b. ( ) el-Muhzır, Mehmed Ağa kethüdâ-yı muhzırân, Seyyid Muharrem Efendi [b.] Mustafa, Musa Efendi, Bekir b. Hüseyin ve gayruhüm.