İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 362 Hüküm no: 352 Orijinal metin no: [92a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Hüseyin’in evini kızı Ayşe’ye olan borcu karşılığı ona devrettiği Mahmiye-i İstanbul’da Debbâğzâde mahallesinde sâkin Ali Beşe b. Hüseyin nâm kimesne meclis-i şer‘-i şerîf-i enverde sulbiye kebîre kızı bâ‘isetü hâze’l-kitâb Ayşe nâm hâtun tarafından husûs-ı âti’l-beyâna vekîl olduğunu zâtını ma‘rifet-i şer‘iyye ile ârifân Mustafa b. Bayram ve İbrahim b. Hüseyin nâm kimesneler şehâdetleri ile şer‘an sâbit olan Müezzin Hasan Efendi b. Mehmed mahzarında ikrâr ve takrîr-i kelâm edip silk-i mülkümde münselik olup [92b] mahalle-i mezbûrede vâki‘ bir tarafdan karındaşım oğlu el-Hâc Ali b. Mustafa ve bir tarafdan İbrahim Paşa vakfı olan menzil ve iki tarafdan tarîk-i âm ile mahdûd, tûlen yirmi dokuz ve arzen yirmi sekiz zirâ‘ mülk arsa üzerine mebnî bir bâb tahtânî oda ve fevkānî bir bâb oda ve bir tahtapûş ve sokak kapısı üzerinde bir bâb oda ve bir matbah ve bi’r-i mâ ve cüneyne ve kenîfi müştemil menzilimi, kızım müvekkile-i mezbûre Ayşe Hâtun’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile üç yüz yetmiş esedî guruşa bey‘ ve teslîm ol dahi ber vech-i muharrer iştirâ ve kabûl ve tesellüm ettiğinden sonra semeni olan meblağ-ı mezbûr üç yüz yetmiş esedî guruşu Ayşe Hâtun kendiye zimmetimde üç yüz yetmiş esedî guruş vâcibü’l-edâ deynim olmağla vech-i muharrer üzre deynim olan meblağ-ı mezbûra takās ben dahi mukāssa ve kabûl eyledim ba‘de’l-yevm menzil-i mahdûd-ı mezbûr merkūme Ayşe Hâtun’un mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Abdurrahman Efendi b. Hanefi el-İmâm, Yusuf Çelebi b. Abdullah, Mustafa Bey b. Çorbacızâde Abdi Çelebi, Miskçi el-Hâc Mustafa b. Ali, Mehmed Çelebi b. Ali, Mustafa [b.] Bayram, Mehmed b. Mustafa ve gayruhüm.