İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 363 Hüküm no: 353 Orijinal metin no: [92b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Affan’ın vakıf evinin yarı hissesini kızının oğlu Mehmed b. Şaban’a devrettiği Mahmiye-i İstanbul’da Sultan Selim Hân -aleyhi’r-rahmeti ve’l-gufrân-câmi‘-i şerîfi kurbunda Çukurbostan mahallesinde sâkine olup zâtı ma‘rifet-i şer‘iyye ile ârifân Ali Efendi b. Mehmed ve Mehmed b. Osman nâm kimesneler ta‘rîfleri ile mu‘arrefe olan Ayşe bt. Affan nâm hâtun meclis-i şer‘-i şerîf-i enverde sadriye kızı oğlu işbu bâ‘isü’l-kitâb Mehmed b. Şaban nâm kimesne mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Yusuf Beşe b. Abdullah mülkü ve bir tarafdan Emine Hâtun mülkü ve bir tarafdan ba‘zan mahalle-i mezbûre imâmına meşrûta vakıf menzil ve ba‘zan mezbûre Emine Hâtun mülkü ve bir tarafdan tarîk-i hâs ile mahdûd iki bâb fevkānî oda ve tahtânî iki bâb oda ve sofa ve bi’r-i mâ ve kenîf ve havluyu müştemil menzilimin nısfını sokak kapısı müşterek olmak üzre mezbûr Mehmed’e tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile on bin akçeye bey‘ ve teslîm ol dahi ber vech-i muharrer iştirâ ve kabûl ettiğinden sonra semeni olan meblağ-ı mezbûr on bin akçeyi mezbûr Mehmed yedinden tamâmen ahz u kabz eyledim ba‘de’l-yevm menzil-i mahdûd-ı mezkûrun nısf-ı şâyi‘i mezbûr Mehmed’in mülk-i müşterâsıdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ali Efendi b. Mehmed, Mehmed b. Ali el-Müezzin, Mehmed Beşe b. Halid, Yusuf Beşe b. Ahmed, Abdülaziz b. Şaban, Ramazan b. Şaban, Mehmed b. Abdülmennân, Haydar b. Abdullah.