İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 364 Hüküm no: 354 Orijinal metin no: [92b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çocuksuz vefat eden Dimitri v. Kiro’nun Kestel vakfının ekmek fırını ve değirmeninde olan hisselerinin diğer hissedar kız kardeşi Sultana’ya kiralanması Sebeb-i tahrîr-i hurûf oldur ki Mahmiye-i İstanbul sâkinlerinden olup mahmiye-i mezbûrede Eskiodalar kurbunda [93a] merhûm Molla Kestel mahallesinde vâki‘ icâreteyn-i ma‘lûmeteyn ile merhûm-ı mezbûrun vakfından olup iki anbarı müştemil olan iki göz değirmeni ile arsası yine merhûm-ı mezbûrun vakfından mukāta‘alı fırın yeri üzerinde olan ebniyesi merhûm Ferhad Paşa vakfından olan ekmekçi fırınının sekiz sehimden yedi sehimine icâreteyn-i ma‘lûmeteyn ile mutasarrıf iken bilâ-veled hâlik olan Dimitri v. Kiro nâm zimmînin li ebeveyn kız karındaşı olup kezâlik zikr olunan değirmen ve fırının sekiz sehimden birer sehimine ber vech-i muharrer mutasarrıf olan Sultana nâm nasrâniyenin zevci tarafından husûs-ı âti’l-beyâna vekîl olduğu nehc-i şer‘î ve tarîk-i mer‘î üzre sâbit olan Tanaş v. Sirapyon nâm zimmî meclis-i şer‘-i şerîfde merhûm-ı mezbûr Molla Kestel vakfına hâlâ mütevellî olan Süleyman Efendi b. Abdurrahman ve merhûm-ı mezbûr Ferhad Paşa vakfına hâlâ mütevellî olan Osman b. Mustafa nâm kimesneler mahzarlarında üzerlerine da‘vâ ve takrîr-i kelâm edip sâbıkan İstanbul kadısı olan a‘lemü’l-ulemâ’i’l-kirâm efdalü’l-fuzalâ’i’l-izâm Sahgî Mustafa Efendi’nin imzâsıyla mümzât hüccet-i şer‘iyye nâtıka olduğu üzre merhûm-ı mezbûr Ferhad Paşa vakfından olan fırının sekiz sehimden yedi sehimine mutasarrıf iken bilâ-veled hâlik olan mezbûr Dimitri’nin ber vech-i muharrer hisseleri vakfeyn-i mezbûreteyne âid oldu deyû zabt murâd edip müvekkilem mezbûre Sultana li ebeveyn kız karındaşı olmağla mûris-i hâlik-i mezbûrun zikr olunan değirmen ve fırında mülk-i mûres binâsı olduğunu da‘vâ ettiğinden sonra terk-i da‘vâ ve vech-i muharrer üzre hissesi olan iki göz at değirmeni ve iki anbardan yedi sehimi mezbûr Süleyman Efendi ve fırın-ı mezbûrdan yedi sehimi mezbûr Osman Bey ecnebîye vermeyip müvekkilem mezbûre Sultana ecr-i misli ile îcâr ile istîcâr etmeğe hâlâ râzıye olmağla suâl olunup mezbûrân Süleyman Efendi ve Osman Bey’e hâlik-i mezbûrun ber vech-i muharrer hissesini mezbûre Sultana’ya îcâr etmek üzre tenbîh olunmak matlûbumdur dedikde gıbbe’s-suâl mütevelliyân-ı mezbûrân kaziyye minvâl-i muharrer üzre olduğu ba‘de’l-beyân vakf-ı evvele icâresi verilen mezkûr anbar ve değirmen ve vakf-ı sânîye icâresi verilen fırından sekiz sehimden hâlik-i mezbûrun hissesi olan yedi sehimi ecnebîye îcâr etmeyip, ecr-i misli ile müvekkile-i mezbûre Sultana’ya îcâr etmek üzre mütevelliyân-ı mezbûrân Süleyman Efendi ve Osman Bey’e tenbîh olunup mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Zilhicceti’ş-şerîfe li sene sitte ve semânîn ve elf. Şuhûdü’l-hâl: Fahrü’l-akrân el-Hâc Kemaleddin, Mustafa Beşe b. Abdullah, el-Hâc Kasım b. Receb, Musa Halîfe b. Receb, Hüseyin Beşe Çukadâr.