İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 365 Hüküm no: 355 Orijinal metin no: [93a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Mustafa’nın evini Mustafa Efendi b. Rüstem’e sattığı Mahmiye-i İstanbul’da Defterdâr Ahmed Çelebi mahallesi ahâlîsinden olup Dergâh-ı âlî yeniçerilerinin elli üçüncü bölüğe mahsûs odada çavuş olan Mehmed Ağa b. Mustafa nâm kimesne meclis-i şer‘-i şerîf-i âlîde Dergâh-ı âlî yeniçerileri ocağında sâbıkan baş yazıcı olan umdetü erbâbü’t-tahrîr ve’l-kalem zübdetü ashâbü’t-tastîr ve’r-rakam bâ‘is-i hâze’l-kitâb Mustafa Efendi b. Rüstem mahzarında ikrâr-ı tâm ve takrîr-i kelâm edip akd-i âtî sudûruna değin silk-i mülk-i sahîhimde münselik olup mahalle-i mezbûrda vâki‘ bir tarafdan tarîk-i âm ve bir tarafdan Emine ve Mücellâ [93b] nâm hâtunlar mülkü ve bir tarafdan ba‘zan Medîne-i Münevvere vakfı ba‘zan İbrahim Beşe mülkü ve bir tarafdan ba‘zan Hüseyin Çelebi mülkü ve ba‘zan Saraylı nâm hâtun mülkü ile mahdûd hâriciyyesinde tahtânî bir bâb oda ve bi’r-i mâ ve cüneyne ve bir kenîf ve dâhiliyyesinde fevkānî bir bâb oda ve tahtânî bir oda ve bir sofa ve bir kiler ve bir matbah ve kenîf ve havluyu müştemil menzilimi cemî‘ tevâbi‘ ve levâhıkı ve âmme-i hukūk ve merâfıkı ile mûmâ-ileyh Mustafa Efendi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile ile beş yüz kırk esedî guruşa bey‘ ve teslîm ol dahi ber vech-i muharrer iştirâ ve kabûl ve tesellüm ettiğinden sonra semeni olan meblağ-ı mezbûr beş yüz kırk esedî guruşu mûmâ-ileyh Mustafa Efendi cihet-i karz-ı şer‘îden kendiye zimmetimde vâcibü’l-edâ deynim olan beş yüz kırk esedî guruşa takās ben dahi mukāssa ve kabûl eyledim ba‘de’l-yevm menzil-i mahdûd-ı mezkûr mûmâ-ileyh Mustafa Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. Mustafa el-İmâm, Ömer Efendi el-İmâm, Abdi Çelebi Sarrâc, Hüseyin Beşe b. Ali, Hüseyin Ağa b. Osman, çorbacı Derviş b. Osman.