İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 365 Hüküm no: 356 Orijinal metin no: [93b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yamandi v. Yanaki ile Nikola’nın ortak kuyumculuk şirketini feshederek birbirlerinin zimmetlerini ibrâ ettikleri Mahrûse-i Galata’da Sultan Bayezid mahallesi sâkinlerinden olup mahmiye-i İstanbul’da Bezzâzistân kurbunda kuyumcu olan Yamandi v. Yanaki nâm zimmî meclis-i şer‘-i şerîfde sulbî oğlu bâ‘is-i hâze’s-sifr Nikolaki nâm zimmî mahzarında ikrâr ve takrîr-i kelâm edip on seneden beri oğlum mezbûr Nikolaki ile kuyumculuk san‘atında şerîkler olup hâlâ fesh-i akd-i şirket ettiğimizden beynimizde hesâb görüp, iki yüz guruş fâ’ide hâsıla olduğu müte‘ayyin oldukdan sonra meblağ-ı mezbûru beynimizde taksîm edip her birimiz kendimize isâbet eden yüz guruşu ahz u kabz ettiğimizden sonra mâl-ı şirket-i mezbûreye müte‘allika âmme-i de‘âvâdan her birimiz âharı ibrâ ve iskāt eyledik dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-hâdî aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Kuyumcubaşı Nuh Ağa, Ehl-i hibre Mehmed Ağa, Bayram Çelebi, Mehmed Çelebi ve gayruhüm.