İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 366 Hüküm no: 357 Orijinal metin no: [93a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şemsi b. Musa’nın alacağı bulunan Ebûbekir b. Hüseyin ile sulh olduğu Mahmiye-i Üsküdar -sânehallâhu ani’l-ekdâr-müzâfâtından Adalar nâhiyesine tâbi‘ Sarıkadı nâm karye ahâlîsinden Şemsi b. Musa nâm kimesne meclis-i şer‘-i şerîfde bâ‘is-i hâze’l-kitâb Ebûbekir b. Hüseyin nâm kimesne mahzarında ikrâr-ı tâm ve takrîr-i kelâm edip bundan akdem bi tarîki’l-karz on beş esedî guruşumu mezbûr Ebûbekir’e def‘ ve teslîm ol dahi ahz u kabz ettiğinden sonra meblağ-ı mezbûru mezbûr Ebûbekir’den taleb ve da‘vâ eylediğimde ol dahi cevâbında meblağ-ı mezbûru bana baban mezbûr Musa’nın karye-i mezbûrede vâki‘ olan tekâlîfden hissesine isâbet eden mikdâr için vermiş idin demekle, beynimizde münâza‘ât-ı kesîre vâki‘ olmuş idi el-hâletü hâzihî muslihûn tavassut edip mezbûr Ebûbekir ile beynimizde altı kıt‘a esedî guruş üzerine inşâ-yı akd-i sulh ettiklerinde ben dahi sulh-ı mezbûru [94a] kabûl ve bedel-i sulh olan meblağ-ı mezbûr altı esedî guruşu mezbûr Ebûbekir yedinden bi’t-tamâm alıp kabz edip bâkī dokuz guruşuna müte‘allika da‘vâdan ben mezbûr Ebûbekir’in zimmetini ibrâ edip mezbûr Ebûbekir dahi bedel-i sulhe müte‘allika da‘vâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Mustafa Çelebi b. el-Hâc Ahmed, Veli b. Mahmud, Hüseyin b. Ebûbekir.