İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 366 Hüküm no: 358 Orijinal metin no: [94a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hanife bt. Abdullah’ın eşi Hacı Ahmed’den muhâla‘a yoluyla boşandığı Mahmiye-i İstanbul’da Kazasker Mehmed Efendi mahallesi sâkinelerinden Hanife bt. Abdullah nâm hâtun meclis-i şer‘-i şerîf-i lâzımü’t-teşrîfde, zevcim mezbûr el-Hâc Ahmed zimmetinde mütekarrir ve ma‘kūdun-aleyh olan bin beş yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre mezbûr el-Hâc Ahmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eyledikden sonra hukūk-ı zevciyyete müte‘allika de‘âvâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Ali Ağa b. Abdullah, Ali Beşe b. Mehmed, İbrahim Beşe b. Ali, Osman Beşe b. Ömer, Ali Çelebi b. Şaban, Mustafa Beşe b. Şaban, Kethüdâ Ali Beşe b. Handan, Kara Mustafa b. Abdullah.