İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 367 Hüküm no: 359 Orijinal metin no: [94a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsa Beşe b. Mehmed’in alacağı olan İsak v. Menahim ile sulh olduğu Dergâh-ı âlî yeniçeri[leri]nin kırk dördüncü bölüğe mahsûs oda yoldaşlarından İsâ Beşe b. Mehmed nâm kimesne meclis-i şer‘-i hatîr-i lâzımü’t-tevkīrde Yenkop cemâ‘atinden bâ‘is-i hâze’s-sifr İsak v. Menahim nâm yahudi muvâcehesinde ikrâr ve takrîr-i kelâm edip târih-i kitâbdan bir sene mukaddem medîne-i Edirne’de Kışlakapısı önünde merkūm İsak yedinden yüz esedî guruşumu altına tebdîl edivereyin deyû yedimden ahz u kabz eylemişdi hâlâ meblağ-ı mezbûr yüz esedî guruşu merkūm İsak’dan taleb ve da‘vâ eylediğimde, ol dahi inkâr etmeğin beynimizde münâza‘ât-ı kesîre vukū‘undan sonra muslihûn tavassut edip merkūm İsak ile beynimizde kırk esedî guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh-ı meblağ-ı mezbûr kırk esedî guruşu mesfûr İsak yedinden tamâmen ahz u kabz ettikden sonra meblağ-ı mezbûr bâkī altmış esedî guruşdan merkūm İsak’ın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin [min] Rebî‘ilevvel li sene seb‘a ve semânîn ve elf. Şuhûdü’l-hâl: Mahmud Beşe b. Yusuf, Mehmed Beşe b. Abdülbâkī, Ahmed Beşe b. Müstecâb, Süleyman Beşe b. Veli onbir ağa bölükden, Mehmed b. Mehmed, Mehmed Beşe b. Yusuf el-Mübâşir, İbrahim Çelebi b. Mehmed, Ebûbekir b. Hüseyin, Hüseyin Beşe b. Mahmud ve gayruhüm mine’l-hâzırîn.