|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 101 Hüküm no: 94 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mustafa b. Mahmud’un bağını Kerime ve Râbia hatunlara sattığı
Vilâyet-i Anadolu’da Beyşehri kazâsına tâbi‘ Alur nâm karye ahâlîsinden Mustafa b. Mahmud nâm kimesne mahfil-i şer‘-i şerîfde karye-i mezbûre sâkinelerinden Kerime ve Râbia bintey Hüseyin nâm hatunlar taraflarından husûs-ı âtîye vekîl olup mezbûretânı ma‘rifet-i şer‘iyye ile ârifân olan Hızır b. Veli ve Abdi b. Hayrullah nâm kimesneler şehâdetleriyle vekâleti sâbite Osman Beşe b. Hasan Beşe nâm kimesne muvâcehesinde ikrâr-ı tâm ve bast-ı merâm kılıp karye-i mezbûre sınırı dâhilinde bir tarafdan İvaz Beşe b. Receb mülkü ve bir tarafdan karye-i mezbûrede vâki‘ olan köprü ve iki tarafdan tarîk-i âm ile mahdûd ve mümtâz olan bir kıt‘a mülk bağımı otuz riyâlî guruşa bey‘-i kat‘î ile mezbûretâna bey‘ edip vekîl-i mezbûr dahi müvekkiletân-ı mezbûretân için iştirâ ve kabûl eyledikden [sonra] semen-i mezbûr otuz guruşa bir re’s doru bârgire vekîl-i mezbûr yedinden iştirâ ve takās-ı semen edip zikri sebk eden bağı mahallinde kabza mezbûretânı teslît eyledim, min-ba‘d benim medhalim ve alâkam kalmamışdır, hasbe-mâ yürîdân mutasarrıfân olsunlar dedikde, gıbbe’t-tasdîk mâ-vaka‘a kayd şüd.
Fî-evâili Şevvâl sene 1063.
Şuhûdü’l-hâl: Mehmed Beşe b. ( ) Çukadâr, Pîrî b. Hüseyin, Rıdvan b. Abdullah, Mehmed Beşe b. ( ) ve gayruhum.
|