|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 101 Hüküm no: 95 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Fâtıma Hatun’un evini Hacer Hatun’a sattığı
Vilâyet-i Rumeli’nde Ohri kasabası mahallâtından Haydarpaşa Mahallesi sâkinelerinden Fâtıma Hatun bt. Mahmud Ağa tarafından menzil-i âti’l-beyânı semen-i misli ile bey‘a ve semenini ahz u kabz ve kendüye îsâle vekîl olup mezbûrenin zâtını ma‘rifet-i şer‘iyye ile ârifân olan Mehmed Bey b. Mustafa ve Ahmed Bey b. Mahmud şehâdetleri ile şer‘an vekâleti sâbite olan İbrahim Çelebi b. Mehmed nâm râcil mahfil-i kazâda yine kasaba-i mezbûrede Koşişte Mahallesi’nde sâkine sâhibet-i hâze’l-kitâb Hacer Hatun bt. Ali Bey tarafından menzil-i câi’z-zikri iştirâ ve def‘-i semene vekîl olan Abdurrahman Efendi b. Mehmed Efendi mahzarında ikrâr ve takrîr-i kelâm edip müvekkilem mezbûre Fâtıma Hatun’un zikr olunan Koşişte Mahallesi’nde vâki‘ cevânib-i erba‘ası Ahmed Bey bahçesi ve Piyale Sipâhî ve Ahmed Çelebi mülkleri ve tarîk-i âm ile mahdûd bir bâb tahtânî odayı ve sundurma ve bi’r-i mâyı ve hadîka-i zât-ı eşcâr-ı müsmire ve gayr-ı müsmireyi müştemil olan mülk menzilimi cümle tevâbi‘i ve levâhıkı ve kâffe-i menâfi‘ ve merâfıkı ile merkūm Abdurrahman Efendi’ye beş bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bi’l-vekâle bey‘ edip ol dahi müvekkilesi mezbûre Hacer Hatun için minvâl-i muharrer üzere iştirâ ve kabûl eyledikden sonra semeni olan meblağ-ı mezbûr beş bin akçeyi müvekkilem mezbûre Fâtıma Hatun’a îsâl etmek için bi’t-tamam ahz u kabz edip meblağ-ı mezbûru mahallinde teslîme vekîli mezbûr Abdurrahman Efendi’yi teslît eyledim dedikde gıbbe’t-tasdîkı’ş-şer‘î meblağ-ı mezbûr [15a] mebî‘-i mezkûrun semen-i misli idiği ol diyâr ahâlîsinden zeyl-i kitâbda isimleri mastûr olan Müslimîn ihbârı ile mukarrer olup mâ-hüve’l-vâki‘ gıbbe’t-taleb ketb ü sebt olundu.
Fi’l-yevmi’s-sâbi‘ min-Şevvâli’l-mükerrem li-sene selâse ve sittin ve elf.
Şuhûdü’l-hâl: Mehmed Ağa b. Ali Bey, el-Hâc Halil Ağa b. Ahmed? el-mezbûr, Receb Efendi el-Müderris-i Hasan Bey, Nuh Çelebi b. Müstedam Efendi.
|