İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 371 Hüküm no: 365 Orijinal metin no: [95b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi yetişkin yaşa geldiğinden vefat eden annesinden intikal eden terekesinin kendisine teslimi Mahmiye-i İstanbul’da Fenerkapısı hâricinde Abdi Subaşı mahallesi sâkinlerinden Dergâh-ı âlî yeniçerilerinin kırk üçüncü bölüğe mahsûs oda yoldaşlarından olan Mehmed Çelebi nâm şâbb-ı emred meclis-i şer‘-i şerîfde babası Ali Çelebi b. Mehmed nâm kimesne mahzarında takrîr-i da‘vâ ve tasvîr-i müdde‘â edip mahalle-i mezbûrede sâkine iken bundan akdem vefât eden Ümmühâni bt. Mehmed nâm hâtunun verâseti, sadrî oğlu olmağla bana ve âhar sadrî oğlu sagīr İbrahim’e ve vâlidesi Gevher bt. Abdullah nâm hâtuna ve zevci babam merkūm Ali Çelebi’ye münhasıra olup hâlâ ben bâliğ ve reşîd olup her vechile tasarrufa kādir olmağla hakīkat-i hâl bî-garaz müslimînden istihbâr olunup taraf-ı şer‘den tasarrufuma izin verildikden sonra vâlide-i müteveffât-ı mezbûre Ümmühâni’nin ber mûceb-i defter-i kassâm makbûzundan benim hissem olan yüz kırk dört bin akçeyi bana teslîme tenbîh olunmak matlûbumdur dedikde husûs-ı mezkûr zikr olunan odanın hâlâ odabaşısı Osman Beşe b. Ali ve İshak Çelebi b. Memi ve es-Seyyid Mehmed Çelebi b. es-Seyyid Abdülkerim ve Hoca Ali Efendi b. Abdülganî ve Şâhin Beşe b. Abdullah ve İvaz Çelebi b. Sefer ve Hüseyin Çelebi b. Hasan nâm kimesnelerden istihbâr olundukda her biri merkūm Mehmed Çelebi bâliğ ve reşîd olup her vechile tasarrufa kādir olduğu merkūm Ali Çelebi muvâcehesinde alâ tarîki’ş-şehâde haber verdiklerinde merkūm Mehmed Çelebi’nin tasarrufuna taraf-ı şer‘-i şerîfden izin verildikden sonra vâlidesi müteveffât-ı mezbûre Ümmühâni’nin terekesinden ber mûceb-i defter-i kassâm hissesi meblağ-ı mezbûr yüz kırk dört bin akçeyi merkūm Mehmed Çelebi’ye teslîme babası merkūm Ali Çelebi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Mehmed b. Musa, el-Hâc Mustafa b. Abdullah, Mehmed Çelebi b. Veli, İbrahim Çelebi b. Ahmed ve gayruhüm.