İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 372 Hüküm no: 367 Orijinal metin no: [95b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın kocasının terekesinden hakkını vermediği iddiasıyla evine gelip paralarına el koyan kızları ve görümcesiyle olan davada kızıyla sulh olduğu Mahmiye-i İstanbul’da Avratpazarı kurbunda el-Hâc İbrahim mahallesinde sâkin iken bundan akdem vefât eden el-Hâc Mahmud b. [Mehmed]? nâm kimesnenin verâseti, zevce-i metrûkesi Hatice bt. Abdullah ve sulbiye kebîre kızları Ayşe ve Sâliha ve li ebeveyn kız karındaşı diğer Ayşe nâm hâtunlara münhasıra olduğu şer‘an mütehakkik oldukdan sonra mezbûre Hatice Hâtun tarafından husûs-ı âti’l-[96a] beyâna vekîl olduğu zâtını ma‘rifet-i şer‘iyye ile ârifân İsmail Efendi b. İbrahim ve Musa Bey b. Muhyiddin nâm kimesneler şehâdetleri ile şer‘an sâbit olan Ömer Efendi b. el-Hâc Mehmed nâm kimesne meclis-i şer‘-i şerîfde müteveffâ-yı mezbûrun kızı mezbûre Ayşe Hâtun’un zevci bâ‘is-i hâze’l-vesîka Ali Çelebi b. İbrahim nâm kimesne mahzarında bi’l-vekâle ikrâr ve takrîr-i kelâm edip bundan akdem mezbûr Ali Çelebi ve mezbûre Sâliha’nın zevci Hasan b. Abdülmennân nâm kimesne ve müteveffâ-yı mezbûrun kız karındaşı mezbûre diğer Ayşe cümlesi müvekkilem mezbûre Hatice Hâtun’un menziline gelip sen mûrisimiz müteveffâ-yı mezbûrun terekesinden bir mikdâr akçesin ahz ve ihfâ etmişsin deyû mezbûr Hatice Hâtun’un bir beledî yastığı içinde mevcûd olan yetmiş sekiz İngiliz ve yaldız altınını fuzûlen ahz u kabz eylediklerinden sonra beynlerinde iktisâm edip zikr olunan yetmiş sekiz altının beş yaldız ve yirmi bir İngiliz cem‘an yirmi altı altınını mezbûr Ali Çelebi zevcesi tarafından vekâleten ahz u kabz etmekle hâlâ müvekkilem mezbûre Hatice Hâtun meblağ-ı mezbûr yirmi altı altını mezbûr Ali Çelebi yedinden geri tamâmen ahz u kabz eylediğinden sonra husûs-ı mezkûra ve sâir hukūk-ı ma‘lûme ve mechûleye müte‘allika âmme-i de‘âvî ve eymân ve mütâlebâtdan mezbûr Ali Çelebi’nin ve zevcesi mezbûre Ayşe Hâtun’un zimmetlerini ibrâ-i âmm-ı kātı‘ü’n-nizâ‘la ibrâ ve iskāt edip ve mezbûr Ali Çelebi dahi müteveffâ-yı mezbûrun yüz sekiz altınını ahz u kabz eyledin deyû zevcesi mezbûre Ayşe tarafından bi’l-vekâle müvekkilem mezbûre Hatice Hâtun’dan bundan akdem da‘vâ ve talebetmiş idi hâlâ mârrü’z-zikr yüz altına ve sâir hukūk-ı ma‘lûme ve mechûleye müte‘allika cemî‘ de‘âvî ve mütâlebâtdan müvekkile-i mezbûre Hatice Hâtun’un zimmetini bi’l-vekâle ibrâ-i âmm-ı râfi‘ü’l-hısâm ile ibrâ ve iskāt eyledi dedikde mezbûr Ali Çelebi mukırr-ı mezbûr Ömer Efendi’yi cemî‘ kelimâtından vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: İsmail Efendi b. İbrahim, Musa b. Muhyiddin, Ahmed Efendi b. ( ), İvaz Efendi, İbrahim b. Ahmed, İbrahim Çelebi b. Hacı Osman, Seyyid Muharrem Efendi b. Abdullah, Mehmed Efendi b. Mehmed, İbrahim Çelebi b. Mehmed, Ebûbekir b. Hüseyin ve gayruhüm.