İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 374 Hüküm no: 369 Orijinal metin no: [96b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Muslihiddin’in anne ve babasının veraseti ve vakıf görevi meselesinde kardeşi Mehmed Ağa’nın zimmetini ibrâ ettiği Mahmiye-i İstanbul’da Hoca Üveys mahallesi sâkinlerinden Ali Çelebi b. Muslihiddin Ağa nâm kimesne meclis-i şer‘-i şerîfde li ebeveyn er karındaşı bâ‘is-i hâze’l-kitâb Mehmed Ağa nâm kimesne tarafından husûs-ı âti’l-beyâna vekîl olduğu es-Seyyid Ahmed Çelebi b. Mustafa ve es-Seyyid Mehmed Çelebi b. Ömer nâm kimesneler şehâdetleri ile şer‘an sâbit olan diğer Mehmed Ağa b. Ramazan nâm kimesne mahzarında ikrâr ve takrîr-i kelâm edip bundan akdem vefât eden babam mezbûr Muslihiddin Ağa ile vâlidem Hatice Hâtun’un terekelerinden bi’l-irsi’ş-şer‘î bana isâbet eden hisse-i şer‘iyyemi terekelerine vâzı‘ü’l-yed olan karındaşım müvekkil-i mezbûr Mehmed Ağa yedinden tamâmen ahz u kabz ettiğimden sonra mahmiye-i mezbûrede Çâşnigir Osman Ağa vakfına vazîfe-i mu‘ayyenesi ile meşrûtiyyet üzre ben bi’l-fi‘l mütevellî olmağla mezbûr Mehmed Ağa tarafımdan kāimmakām olup on iki senede müctemi‘ olan vazîfemi ahz u kabzetmiş idi hâlâ ber vech-i muharrer makbûzu olan vazîfemi dahi karındaşım müvekkil-i mezbûr Mehmed Ağa yedinden bi’t-tamâm ahz ve kabz eyledim ba‘de’l-yevm vâlideynim müteveffiyân-ı mezbûrânın terekelerine ve zikr olunan vazîfeye müte‘allika cemî‘ de‘âvî ve mütâlebâtdan karındaşım müvekkil-i mezbûr Mehmed Ağa’nın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mustafa Efendi b. Himmet el-İmâm, Mahmud Çelebi b. Hasan, Musa Efendi b. Himmet, es-Seyyid Mustafa b. Bayram, Mustafa b. Receb, el-Hâc Yusuf b. Abdullah ve gayruhüm mine’l-hâzırîn.