İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 377 Hüküm no: 372 Orijinal metin no: [97b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. İlyas’ın Rus kölesi Hasan b. Abdülvehhâb’ın serbest ve hür olduğu Rıkk-ı sâbıkını mu‘terif olan işbu açık kaşlı ala gözlü orta boylu mültecî Rûsiyyü’l-asl bâ‘is-i hâze’l-kitâb Hasan b. Abdülvahhab meclis-i şer‘-i şerîfde rakīk olmak üzre kendiye vâzı‘ü’l-yed olan Mehmed Bey b. İlyas nâm kimesne mahzarında üzerine da‘vâ ve takrîr-i kelâm edip mezbûr Mehmed Bey târih-i kitâbdan yedi sene mukaddem yedinde abd-i memlûkü olduğum hâlde malından beni tahrîr ve i‘tâk ve zümre-i ahrâr-ı asliyeye idrâc ve ilhâk edip ben sâir ahrâr-ı asliyye gibi hür olmuşken mezbûr Mehmed Bey bana rakīk olmak üzre bi gayri hakkın vaz‘-ı yed eder hâlâ mezbûr Mehmed Bey’e suâl olunup üzerimden yed-i mubtılasının kasr ve izâlesine tenbîh olunup sebîlim tahliyye olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan ber vech-i muharrer hürriyetine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Mehmed Bey’e müdde‘î-i mezbûr Hasan’ı yedinde mülkü olduğu hâlde malından tahrîr ve i‘tâk etmediğine yemîn teklîf olundukda ol dahi yemînden nükûl etmeğin mûcebince müdde‘î-i mezbûrun ber vech-i muharrer hürriyetine ba‘de’l-hükmi’ş-şer‘î üzerinden yed-i mubtılasının kasr ve izâlesine mezbûr Mehmed Bey’e tenbîh olunup müdde‘î-i mezbûr Hasan’ın sebîli tahliyye olunmağın mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Abdi b. Ali, Yusuf Efendi b. Ali, Mehmed Halîfe b. Atâullâh , Mehmed Çelebi b. Abdullah, İbrahim Çelebi b. Mehmed ve gayruhüm.