İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 377 Hüküm no: 373 Orijinal metin no: [97b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamide bt. Kasım’ın eşi çorbacı Mustafa Ağa b. Bayram’dan boşandığı Mahmiye-i İstanbul’da Öksüzce mahallesi sâkinelerinden olup zâtı ma‘rifet-i şer‘iyye ile ârifân mahalle-i mezbûre sükkânından Mustafa Beşe b. Mehmed ve Ahmed Beşe b. Şaban nâm kimesneler ta‘rîfleri ile mu‘arrefe olan Hamide bt. Kasım nâm hâtun meclis-i şer‘-i şerîfde zevc-i dâhili olan bâ‘is-i hâze’l-kitâb çorbacı Mustafa Ağa b. Bayram nâm kimesne tarafından husûs-ı âti’l-beyâna vekîl olduğu merkūm Mustafa Beşe ve Ahmed Beşe şehâdetleri ile şer‘an sâbit olan fahrü’l-müderrisîn Ahmed Efendi b. el-merhûm Abdülcelîl Efendi mahzarında ikrâr ve takrîr-i kelâm edip zevcim merkūm Mustafa Ağa zimmetinde mütekarrir ve ma‘kūdun-aleyh olan on beş bin akçe mehr-i müeccelimin on iki bin akçesini merkūm Mustafa Ağa yedinden tamâmen ahz u kabz edip bâkī üç bin akçesi ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre merkūm [98a] Mustafa Ağa ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete müte‘allika âmme-i de‘âvâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Beşe b. Mehmed, Ali Ağa b. Sefer, Derviş b. Hasan, Mehmed Beşe b. Mustafa, İmâm Ahmed Efendi ve gayruhüm.