İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 378 Hüküm no: 374 Orijinal metin no: [98a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Reis’in eski Tunus kadısı Abdurrahman Efendi’de olan pirinç satışından alacağının tahsili için Abdurrahman Efendi’ye tembihatta bulunulduğu Mahrûse-i Galata’da Emekyemez mahallesi sâkinlerinden Mustafa Reis b. Ömer Muhibbâ nâm kimesne meclis-i şer‘-i şerîfde sâbıkan Tunus kadısı olan Abdurrahman Efendi b. Ebü’l-Bereket nâm kimesne mahzarında üzerine da‘vâ ve takrîr-i kelâm edip ticâretde şerîkim olup bundan akdem vefât eden Ali b. İsâ nâm kimesne ile hayâtında yedimizde müşterek olan pirinçden her keyli birer guruşa ve birer semene olmak üzre bin beş yüz keyl pirincimizi bin altı yüz elli guruşa merkūm Abdurrahman Efendi’ye bey‘ ve teslîm ol dahi iştirâ ve tesellüm etmiş idi hâlâ merkūm Abdurrahman Efendi’ye suâl olunup semen-i mezbûrdan hissem olan sekiz yüz yirmi beş guruşu bana edâ ve teslîme tenbîh olunmak matlûbumdur dedikde gıbbe’s-suâl mezbûr Abdurrahman Efendi cevâbında zikr olunan bin beş yüz keyl pirinci müdde‘î-i mezbûr ile şerîki olan müteveffâ-yı mezbûrdan bin altı yüz elli guruşa iştirâ ve kabz ettiğini ikrâr, lâkin semen-i mezbûrun beş yüz elli guruşunu müdde‘î-i mezbûrun vekîli olan el-Hâc Kasım nâm kimesneye diyâr-ı Mısır’da Behnese kasabasında edâ ve teslîm ol dahi ahz u kabz edip ve seksen guruşuna iki Cezâyir ihrâmını ve elli guruşuna bir kebîr tüfengimi müteveffâ-yı mezbûr Ali’ye hayâtında bey‘ ve teslîm ol dahi iştirâ ve tesellüm etmiş idi deyû müdde‘î-i mezbûru ba‘zı müdde‘âsında def‘ ile mukābele edicek gıbbe’l-istintâk ve’l-inkâr mezbûr Abdurrahman Efendi’den def‘-i mezbûru mübeyyine beyyine taleb olundukda ityân-ı beyyine için istimhâl etmekle mehil-i şer‘-i ile imhâl olunup merkūm Abdurrahman Efendi’nin ikrârı mûcebince semen-i mezbûrdan bâkī dokuz yüz yetmiş guruşdan müdde‘î-i mezbûr Mustafa Reis’e edâ ve teslîme merkūm Abdurrahman Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâdis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Mehmed Çelebi b. Abdullah, el-Hâc Mehmed b. Receb, el-Hâc Hasan b. Mustafa, Mehmed Çavuş b. Pîrî ve gayruhüm.