İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 379 Hüküm no: 375 Orijinal metin no: [98a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. Mustafa’nın eşi İvaz b. Yusuf’tan muhâla‘a yoluyla boşandığı Mahmiye-i İstanbul’da Karabaş mahallesinde sâkine Emetullah bt. Mustafa nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Müezzin Mehmed b. Ramazan ve Mehmed b. Ebûbekir nâm kimesneler şehâdetleri ile şer‘an sâbit olan İmâm Hasan Efendi b. Mustafa nâm kimesne meclis-i şer‘-i şerîfde müvekkile-i mezbûrenin zevc-i muhâlı‘ı bâ‘isü’l-kitâb İvaz b. Yusuf nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûr Emetullah bin seksen altı senesi Recebi’nin on sekizinci gününde zevci mezbûr İvaz ile zimmetinde mütekarrir ve ma‘kūdun-aleyh mehr-i müecceli olan bin akçe ile nafaka-i iddet-i ma‘lûmesi üzerlerine ve me’ûnet-i süknâsı dahi müvekkilemin kendi üzerine olmak üzre mezbûr İvaz ile muhâla‘a-i sahîha-i şer‘iyye ile muhâla‘a edip mezbûr İvaz dahi muhâla‘a-i mezbûreyi kabûl ettiğinden sonra hukūk-ı zevciyyete müte‘allika âmme-i de‘âvâdan her biri âharın zimmetini ibrâ-i âm ile ibrâ ve iskāt eylediler dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Es-Seyyid Ali b. Yakub, Ahmed Bey b. Sinan, Yahya b. Receb, Hasan b. Mahmud, Mustafa b. Abdullah ve gayruhüm.