İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 379 Hüküm no: 376 Orijinal metin no: [98b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Halil b. Abdurrahman’ın evini 27. Ağa Bölüğü Vakfı’na bey‘ bi’l-istiğlâl yoluyla sattığı Mahmiye-i İstanbul’da Karabaş mahallesinde sâkin Mustafa Halil b. Abdurrahman nâm kimesne meclis-i şer‘-i şerîf-i lâzımü’t-teşrîfde, Dergâh-ı âlî yeniçerilerinden yirmi yedinci ağa bölüğüne mahsûs odanın nukūd-ı mevkūfesine bi’l-fi‘l mütevellîsi olan bâ‘is-i hâze’l-kitâb Mustafa Beşe b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrda vâki‘ bir tarafdan umdetü’l-emâcid ve’l-ekârim Bektaş Ağa odaları ve bir tarafdan Hâce Emine Hâtun mülkü ve bir tarafı kendi âhar menzilim ve bir tarafı tarîk-i âm ile mahdûd büyût-ı adîdeyi müştemil menzilimi, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık mütevellî-i mûmâ-ileyh Mustafa Beşe’ye yüz on esedî guruşa bi tarîki’l-istiğlâl bey‘ ve teslîm ol dahi yedinde olan mâl-ı vakf-ı mezbûr ile iştirâ ve tesellüm ve semen-i mezbûru bana edâ ve teslîm ben dahi ahz u kabz ettiğimden sonra mütetevellî-yi mûmâ-ileyh Mustafa Beşe menzil-i mahdûd-ı mezbûru ba‘de’t-tahliyyeti’ş-şer‘iyye ve’t-takābuzi’l-mer‘î târih-i kitâbdan bir sene tamâmına değin on altı buçuk esedî guruşa bana îcâr ve teslîm ben dahi vech-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î menzil-i mezbûrun derkine ve ücret-i lâzımesine merkūm Mustafa Çelebi’nin kayınatası hâzır bi’l-meclis Mustafa Beşe b. Abdullah nâm kimesne tarafeynden emir ve kabûlü hâviye kefâlet ile kefîl olmağın mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Hâlâ Odabaşı Hasan Beşe b. Receb, Ali Beşe b. Abdullah, el-Hâc Abdurrahman b. Ali, Ali Beşe b. Abdullah, Sâlih Beşe b. Abdullah, mahalle-i mezbûre İmâmı Ahmed Efendi, Ali Beşe b. Ahmed ve gayruhüm mine’l-hâzırîn.