İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 380 Hüküm no: 377 Orijinal metin no: [98b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Abdullah’ın eşi Mehmed b. Ömer’den muhâla‘a yoluyla boşandığı Mahmiye-i İstanbul’da Murad Paşa-yı Atîk mahallesi sâkinelerinden Fâtıma bt. Muslu nâm hâtunun vâlidesi ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre sükkânından Piyâle b. Abdullah ve Hasan b. Bilâl nâm kimesneler şehâdetleri ile sâbit olan Ümmühâni bt. Abdullah nâm hâtun meclis-i şer‘-i şerîfde müvekkile-i mezbûre Fâtıma Hâtun’un zevc-i dâhili bâ‘is-i hâze’l-kitâb Mehmed b. Ömer nâm kimesnenin karındaşı ve tarafından kezâlik husûs-ı câ’i’z-zikre vekîl olduğu Ömer b. Enbiyâ ve Mehmed b. Musa nâm kimesneler şehâdetleri ile şer‘an sâbit olan Himmet b. Ömer nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma Hâtun’un müvekkil-i mezbûr Mehmed zimmetinde mütekarrir ve ma‘kūdun-aleyh mehr-i müecceli olan dört bin beş yüz akçe ile nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzre ve mezbûr Mehmed’in firâşından hâsıl sadriye sagīre kızı Ayşe’yi dokuz yaşına değin kendi malı ile infâk ve iksâ etmek üzre mezbûr Mehmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eylediğinden sonra hukūk-ı zevciyyete ve mukaddemâ hüccet-i şer‘iyye ile takdîr olunan yevmî onar akçeden müvekkilem mezbûre Fâtıma Hâtun mezbûr Mehmed’in zimmetini ibrâ-i âm ile ibrâ ve iskāt edip ve müvekkil-i mezbûr Mehmed dahi müvekkile-i mezbûre Fâtıma Hâtun’un zimmetini hukūk-ı zevciyyete ve sâir hukūka müte‘allika âmme-i de‘âvâdan ber vech-i muharrer iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Süleyman Beşe b. Mustafa, Hüseyin Çelebi b. Mehmed, Mustafa b. Ömer, Hüseyin Çelebi b. Mahmud ve gayruhüm.