İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 381 Hüküm no: 378 Orijinal metin no: [99a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Sâbit’in arsasını Ahmed Efendi b. Hüseyin’e sattığı Mahmiye-i İstanbul’da İskender Ağa mahallesi sükkânından Cafer b. Sâbit nâm kimesne meclis-i şer‘-i şerîfde bâ‘is-i hâze’l-kitâb Ahmed Efendi b. Hüseyin nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Gül câmi‘i kurbunda Çukur mahallesinde vâki‘ bir tarafdan ba‘zan fındıkçı Mahmud Beşe ve ba‘zan Fâtıma Hâtun mülkleri ve bir tarafdan mahalle-i mezbûre avârızına mevkūf ba‘zan Tahinci Ali ve ba‘zan es-Seyyid Hasan menzilleri ve bir tarafdan İsmail Ağa menzili ve bir tarafı tarîk-i hâs ile mahdûd mülk arsa-i hâliyemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘-i ile mezbûr Ahmed Efendi’ye kırk esedî guruşa bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr kırk esedî guruşu mezbûr Ahmed Efendi yedinden tamâmen ahz u kabz eyledim ba‘de’l-yevm arsa-yı mahdûd-ı mezbûr merkūm Ahmed Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Rebî‘ilevvel li sene seb‘a ve semânîn ve elf. Şuhûdü’l-hâl: Es-Seyyid Lütfullah Çelebi b. es-Seyyid Mustafa, es-Seyyid Mehmed Çelebi b. es-Seyyid Lütfullah, Hüseyin Efendi b. Abdülfettâh el-İmâm, Receb Efendi b. Hüsameddin el-Müezzin, Mehmed Efendi b. Ahmed, Mehmed Beşe b. Abdullah ve gayruhüm.