İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 381 Hüküm no: 379 Orijinal metin no: [99a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Ahmed Yazıcı b. Nasûh’un vârisleri hanımı Şerife Emine bt. Mehmed ile kız kardeşi Emine’nin sulh oldukları Mahrûse-i Galata’ya tâbi‘ kasaba-i Fındıklı’da Mahmud İmâm mahallesinde sâkin olup bundan akdem vilâyet-i Rumeli’nde İbrâil kasabasında bi tarîki’l-müsâfere sâkin iken fevt olan Ahmed Yazıcı b. Nasûh’un verâseti, zevce-i metrûkesi Şerife Emine bt. Mehmed nâm hâtun ile li ebeveyn kız karındaşı diğer Emine nâm hâtuna münhasıra olduğu şer‘an zâhir ve müte‘ayyin oldukdan sonra mezbûre diğer Emine Hâtun’un zevci ve tarafından husûs-ı âti’l-beyâna vekîl olup mahalle-i mezbûre sükkânından Hüseyin Beşe b. Kasım ve Murad Beşe b. Ahmed nâm kimesneler şehâdetleriyle şer‘an vekâleti sâbite olan Mehmed Beşe b. Şaban nâm kimesne meclis-i şer‘de, işbu bâ‘isü’l-kitâb mezbûre Şerife Emine mahzarında bi’l-vekâle ikrâr ve takrîr-i kelâm edip müvekkilem mezbûre diğer Emine Hâtun ile müteveffâ-yı mezbûrun terekesinden Kâtib Muslihiddin vakfına deyni olan yüz esedî guruşa kefîl olmuş idim deyû bi gayri hakkın ahz u kabzetmiş idin deyû da‘vâ, ol dahi isbât edip almış idim deyip beynlerinde münâza‘ât-ı kesîre vâki‘ olmuş idi el-hâletü hâzihî muslihûn tavassut edip müvekkile-i mezbûre diğer Emine Hâtun ile mezbûre Şerife Emine Hâtun beynlerinde yetmiş bir kıt‘a esedî guruş üzerine inşâ-i akd-i sulh ettiklerinde mezbûre diğer Emine Hâtun dahi sulh-ı mezbûru kabûl ve bedel-i sulh olan meblağ-ı mezbûr yetmiş bir esedî guruşu mezbûre Şerife Emine Hâtun yedinden bi’t-tamâm alıp kabz edip meblağ-ı mezbûr yüz guruşa müte‘allika da‘vâdan müvekkil-i mezbûre diğer Emine Hâtun mezbûre Şerife Emine’nin zimmetini ve bedel-i sulhe müte‘allika da‘vâdan dahi müvekkile-i mezbûrenin zimmetini mezbûre Emine Hâtun ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Rebî‘ilevvel sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Ebûbekir b. Hüseyin, Veli b. Mahmud, Mehmed b. Mehmed, Mehmed Çelebi b. Abdullah ve gayruhüm.