İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 382 Hüküm no: 380 Orijinal metin no: [99b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. el-Hâc Ali’nin kölesi Rus asıllı Demirhan bt. Abdullah’ı azat ettiği Mahmiye-i İstanbul’da Hoca Veyis mahallesinde sâkine iken bundan akdem vefât eden Hatice bt. el-Hâc Ali nâm hâtunun verâseti, sulbî kebîr oğulları Mehmed Ağa ve Ali Ağa b. Muslihiddin nâm kimesnelere münhasıra olduğu şer‘an zâhir ve mütehakkik oldukdan sonra mezbûr Mehmed Ağa tarafından husûs-ı âti’z-zikre vekîl olduğu mahalle-i mezbûre sâkinlerinden es-Seyyid Mehmed b. Ömer ve es-Seyyid Ahmed b. Mustafa nâm kimesneler şehâdetleri ile şer‘an sâbit olan Mehmed Çelebi b. Ramazan nâm kimesne vekâleten mezbûre Ali Ağa asâleten meclis-i şer‘-i şerîf ve mahfil-i dîn-i münîfde, ikrâr ve takrîr-i kelâm edip müteveffât-ı mezbûre Hatice’nin terekesinden olup rıkkını mu‘terife olan işbu uzun boylu açık sarı kaşlı ala gözlü Rûsiyyetü’l-asl bâ‘is-i hâze’l-kitâb Demirhan bt. Abdullah nâm câriyeyi men a‘taka rakabeten mü’mineten a‘takallâhu bi külli uzvin minhâ uzven minhu mine’n-nâr hadîs-i şerîfle âmil olup hasbetellâhi’l-meliki’l-Hallâk ve taleben li merzâti’r-rabbi’r-Rezzâk tahrîr ve i‘tâk ve zümre-i harâir-i asliyyâta idrâc ve ilhâk eyledik ba‘de’l-yevm mevsûfe-i mezbûre Demirhan sâir harâir-i asliyyât gibi hürre olup üzerinde velâ-i şer‘îden gayrı bir nesne kalmadı dediğinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’s-sânî aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Es-Seyyid Mehmed b. Ömer el-Müezzin, es-Seyyid Ahmed b. Mustafa, Mustafa b. Receb, Ali b. Ahmed, Mehmed b. Şaban, Musa Efendi b. Himmet, Mustafa Efendi b. Himmet el-İmâm, Mahmud Çelebi b. Hasan, es-Seyyid Mustafa Çelebi b. ( ) el-Hâc Yusuf b. Abdülkādir, Receb Çelebi b. Murad, İbrahim Çelebi b. Ahmed ve gayruhüm mine’l-hâzırîn.