İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 383 Hüküm no: 381 Orijinal metin no: [99b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Mehmed’in, boşandığı eşi Abbas Efendi b. Mehmed aleyhindeki alacak davasını ispatlayamadığı için menedildiği Mahmiye-i İstanbul’da Mimar Sinan mahallesi sâkinelerinden Ümmühâni bt. Mehmed nâm hâtun zâtı ma‘rifet-i şer‘iyye ile ârifân el-Hâc İbrahim b. Ahmed ve Hüseyin Efendi b. Mehmed nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde zevc-i sâbıkı bâ‘is-i hâze’l-kitâb Abbas Efendi b. Mehmed nâm kimesne mahzarında üzerine da‘vâ ve takrîr-i kelâm edip mezbûr Abbas Efendi ile zevciyyet beynimizde kāime iken târih-i kitâbdan üç sene mukaddem eşyâ-i memlûkemden her miskāli ikişer esedî guruş kıymetli elli miskāl bir çift altın bileziğimi ve her miskāli ikişer esedî guruş kıymetli yirmi beş miskāl bir çift altın bileziğimi ve her miskāli ikişer esedî guruş kıymetli yirmi beş miskāl altın düğmemi ve yüz ellişer esedî guruş kıymetli dört re’s câriyemi fuzûlen ahz u kabz edip ve mahmiye-i mezbûrede Vefâ kurbunda vâki‘ ma‘lûmü’l-hudûd menzilimi dahi iki yüz esedî guruşa fuzûlen âhara bey‘ ve kabz-ı semen etmekle hâlâ mezbûr Abbas Efendi’ye suâl olunup eşyâ-i mezkûre ve cevârî-i merkūme mevcûde ise aynıların müstehleke ise kıymet-i şer‘iyyelerin ve menzil-i mezbûrun bey‘ini mücîze olmağla semenini bana teslîme tenbîh olunmak matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmekle mezbûr Abbas Efendi’ye fi’l-hakīka müdde‘iye-i mezbûreyi ber vech-i muharrer iki yüz esedî guruşa [100a] bey‘ ve kabz-ı semen etmeyip elân üzerine redd-i zamândan bir nesne lâzım olmadığına yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince müdde‘iye-i mezbûre bilâ-beyyine vech-i muharrer üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Defterdâr imâm[ı] Mehmed Efendi b. Mustafa, İbrahim Çelebi b. Ahmed, Ahmed Çelebi el-Müezzin, İsâ Bey b. ( ) camcı, Ahmed Çelebi sarrâc, el-Hâc Ahmed sandıkçı, Hızır Odabaşı, Osman Halîfe el-Kayyım, Mehmed b. Mehmed.