İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 384 Hüküm no: 382 Orijinal metin no: [100a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Reis b. Mehmed’in alacağı bulunan Yorgi v. Manol ile sulh olduğu Mahmiye-i İstanbul hısnı ebvâbından Cebeali Kapısı hâricinde vâki‘ tüfenkhânede sâkin Osman Reis b. Mehmed nâm kimesne meclis-i şer‘de bâ‘isü’s-sifr Yorgi v. Manol nâm zimmî muvâcehesinde ikrâr ve takrîr-i kelâm edip mezbûr Yorgi ile kömürcülük san‘atından şerîkler olup bundan akdem fesh-i akd-i şirket ettiğimizde asl-ı mâldan kırk esedî guruş hakkım zuhûretmiş idi hâlâ meblağ-ı mezbûru merkūm Yorgi’den taleb eylediğimde, ol dahi inkâr etmekle beynimizde nizâ‘-ı küllî vukū‘undan sonra muslihûn tavassut edip mezbûr Yorgi ile beynimizde meblağ-ı mezbûr da‘vâsından yirmi beş esedî guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr on beş esedî guruşu mezbûr Yorgi yedinden tamâmen ahz u kabz edip meblağ-ı bâkī on beş esedî guruş da‘vâsından mezbûr Yorgi’nin zimmetini ibrâ ve iskāt eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min şehri Rebî‘ilevvel li sene 1087. Şuhûdü’l-hâl: İbrahim Çelebi b. Ahmed, Hüseyin b. Ahmed, Mehmed b. Mehmed, Ebûbekir b. Hüseyin, Deli Bekir b. Mahmud, Mehmed Çelebi b. ( ) sertüfenkçiyân, Mustafa Çelebi b. ( ), Hüseyin Çelebi.