İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 384 Hüküm no: 383 Orijinal metin no: [100a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Murad’ın evini Rahime bt. Süleyman Hâtun’a sattığı Medîne-i Ebâ Eyyûb-i Ensârî -aleyhi rahmeti rabbü’l-Bârî-mahallâtından Ulucababa mahallesi sâkinlerinden Mehmed Beşe b. Murad nâm kimesne meclis-i şer‘-i şerîfde zâtı ma‘rifet-i şer‘iyye ile ârifân Yusuf b. Abdullah ve Kenan b. Abdullah nâm kimesneler ta‘rîfleri ile mu‘arrefe olan bâ‘isetü hâze’l-kitâb Rahime bt. Süleyman nâm hâtun mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrda vâki‘ bir tarafdan mezbûre Rahime Hâtun mülkü ve bir tarafdan Ramazan Bey mülkü ve bir tarafdan Kayıkçı mülkü ve bir tarafdan tarîk-i âm ile mahdûd olup tahtânî bir bâb oda ve bir sofa ve bir kenîf ve cüneyneyi müştemil menzilimi, bi cümleti’t-tevâbi‘ ve’l-levâhık mezbûre Rahime Hâtun tarafından îcâb ve kabûlü hâvî bey‘-i kat‘î ile yirmi üç guruşa bey‘ ve teslîm ol dahi ber vech-i muharrer iştirâ ve tesellüm eylediğinden sonra semeni olan meblağ-ı mezbûr yirmi üç guruşu mezbûre Rahime hâtun yedinden tamâmen ahz u kabz eyledim ba‘de’l-yevm menzil-i mahdûd-ı mezbûr mezbûre Rahime Hâtun’un mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Yusuf Beşe b. Abdullah, Kenan b. Abdullah, Şükür b. Süleyman, Hasan b. Abdullah, Hasan Çelebi b. Abdullah ve gayruhüm.