İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 385 Hüküm no: 384 Orijinal metin no: [100a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal Yani v. Yorgi’nin vârislerinin Yani v. Rizo’daki alacaklarını tahsil ettikleri Mahmiye-i İstanbul’da Zindan kapısı dâhilinde bakkal iken hâlik olan Yani v. Yorgi nâm zimmînin verâseti, vâlidesi İstamo bt. Andriye nâm nasrâniyye ile sagīr oğlu Yorgi’ye münhasıra olduğu şer‘an sâbit ve mütekarrir oldukdan sonra mezbûre İstamo kendi tarafından asâleten ve sagīr-i mezbûrun tesviye-i umûruna kıbel-i şer‘den mansûbe vasîsi olmağla vesâyeten meclis-i şer‘-i şerîfde hâlik-i mezbûrun hayâtında şerîki olmağla terekesine vâzı‘ü’l-yed olan râfi‘-i hâze’l-kitâb Yani v. Rizo nâm zimmî muvâcehesinde ikrâr ve takrîr-i kelâm edip hâlik-i mezbûr Yani hayâtında mezbûr Yani ile bakkallık san‘atında şerîkler olup ba‘dehu hâlik oldukda mâl-ı şirket-i mezbûreden mezbûr Yani yedinde hâlik-i mezbûrun seksen bin akçe hakkı kalıp meblağ-ı mezbûru mezbûr Yani yedinden hâlik-i [100b] mezbûrun seksen bin akçe hakkı kalıp meblağ-ı mezbûru mezbûr Yani’den taleb ve da‘vâ eylediğimde, ol dahi cevâbında meblağ-ı mezbûrun üç yüz elli guruş olmak üzre kırk iki bin akçesini hâlik-i mezbûrun dâyini olan Silyo nâm zimmîye edâ ve teslîm edip ve yirmi bin akçesini dahi hâlik-i mezbûrun sâir ma‘lûmü’l-esâmî olan dâyinlerine verip on sekiz bin akçesi yedimde kalmışdı demekle, ben dahi meblağ-ı mezbûr on sekiz bin akçemi mezbûr Yani yedinden tamâmen ahz u kabz edip min ba‘d meblağ-ı mezbûrdan mezbûr Yani yedinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Rebî‘ilevvel li sene seb‘a ve [semânîn ve] elf. Şuhûdü’l-hâl: Mehmed Çelebi b. Abdullah, İbrahim Çelebi b. Ahmed, Ebûbekir b. Hüseyin, Osman b. Ömer, Veli b. Mahmud, Muharrem b. Hüseyin, Franko v. Mihal, Todori v. Mihal, Yani v. Nikola, Trandafilo v. Yorgi, Nikola v. Yorgi, Yani v. Dimitri ve gayruhüm.