İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 386 Hüküm no: 385 Orijinal metin no: [100b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni Kelaz v. Kelaser’in kaybedip Nikola v. Kanil’in elinde bulduğu katırının kendisine iadesine karar verildiği Tüccârdan olup vilâyet-i Anadolu’da Divriği kasabası ahâlîsinden olan bâ‘is-i hâze’l-kitâb Kelaz v. Kelaser nâm Ermeni meclis-i şer‘-i şerîfde mekkârî tâ’ifesinden Nikola v. Kanil nâm zimmî muvâcehesinde üzerine da‘vâ ve takrîr-i kelâm edip mezbûr Nikola’nın yedinde olan işbu doru katır kasaba-i mezbûrede İsmail nâm kimesneden otuz üç guruş semen-i merfû‘a müşterâ ve makbûz mülküm oldukdan sonra târih-i kitâbdan iki sene mukaddem kasaba-i mezbûre kurbunda Çiçekdağı’nda yedimden zâyi‘ olmuşdu hâlâ mezbûr Nikola bi gayri hakkın vaz‘-ı yed eder suâl olunup zikr olunan katırı bana teslîme mezbûr Nikola’ya tenbîh olunmak matlûbumdur dedikde gıbbe’s-suâl mezbûr Nikola cevâbında zikr olunan katırı târih-i kitâbdan bir buçuk sene mukaddem medîne-i Edirne’de Aydınlı bir kimesneden otuz esedî guruşa iştirâ ve tesellüm etmekle vaz‘-ı yed ederim, müdde‘î-i mezbûrun ber vech-i muharrer mülkü olduğu ma‘lûmum değildir deyicek müdde‘î-i mezbûrdan müdde‘âsını mübeyyine beyyine taleb olundukda kasaba-i mezbûr ahâlîsinden olup mahmiye-i mezbûrede Ayazmakapısı’nda hâlâ hammâl olan Mustafa b. Halil ve ekmekçi olan Yosef b. Arzuman nâm kimesneler ile Asvadur v. Sirun nâm Ermeni li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Nikola’nın yedinde işbu doru katır kasaba-i mezbûrede İsmail nâm kimesneden otuz üç guruş-ı merfû‘a müşterâ ve makbûz müdde‘î-i mezbûr Kelaz’ın mülküdür biz bu husûsa bu vech üzre şâhidleriz, şehâdet dahi ederiz deyû edâ-i şehâdet-i şer‘iyye eylediklerinde ba‘de’t-tasdîk ve’t-tezkiyye şehâdetleri makbûle oldukdan sonra müdde‘î-i mezbûra zikr olunan katırı âhara bey‘ yâ hibe yâ turuk-ı şer‘iyyeden [bir] tarîkle mülkünden ihrâc etmediğine yemîn teklîf olundukda ol dahi alâ vefki’l-mes’ûl yemîn billâhi’llezî enzele [101a] ’l-İncîle alâ İsâ -aleyhi’s-selâm-etmeğin mûcebince zikr olunan katırı müdde‘î-i mezbûra teslîme mezbûr Nikola’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Es-Seyyid Ahmed Çelebi b. Nasreddin, Abdi Çelebi b. Süleyman, Hasan Çelebi b. Mustafa, Hüseyin b. Ebûbekir, Osman b. Ömer ve gayruhüm mine’l-hâzırîn.