İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 387 Hüküm no: 386 Orijinal metin no: [101a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Esma bt. Derviş’in boşandığı kocasından olan çocuğunun nafakasını tahsil ettiği ve yeniden evlendiğinden nafakayı kendisinin karşılayacağı Mahmiye-i İstanbul’da Manisalı [Çelebi] mahallesinde sâkin olup zâtı ma‘rifet-i şer‘iyye ile ârifân İbrahim Beşe b. Derviş ve Mustafa b. Rıdvan nâm kimesneler ta‘rîfleri ile mu‘arrefe olan Esmâ bt. Derviş nâm hâtun meclis-i şer‘de, sâbıkan zevci olan işbu bâ‘isü’l-kitâb Ali Beşe b. Hüseyin mahzarında ikrâr ve takrîr-i kelâm [edip] mezbûr Ali Beşe zevcim olup bundan akdem beni bâyinen tatlîk ettiğinden sonra mezbûrun firâşından hâsıl olan sadrî sagīr oğlum Ahmed’in nafaka ve kisvesi için mezbûr Ali Beşe üzerine yevmî dörder akçe farz ve takdîr ettirmiş idim hâlâ sagīr-i mezbûrun ber vech-i muharrer nafaka-i mefrûzasından dokuz ayda müctemi‘ olan on dokuz kıt‘a esedî guruş mezbûr Ali Beşe yedinden tamâmen ahz u kabz eyledim dedikde gıbbe’t-tasdîki’ş-şer‘î mezbûre Esmâ Hâtun i‘âde-i kelâm edip ben nefsimi zevc-i âhara inkâh ve tezvîc etmekle hakk-ı hidâne üzerimden sâkıt olmağın sagīr-i mezbûru ba‘de’l-yevm yedi yaşına varınca kendi malımdan infâk ve iksâya ta‘ahhüd eyledim dedikde isre’t-tasdîki’ş-mer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Beşe b. Ramazan, Receb b. Abdullah, Sâlih b. Abdullah, Receb b. Ramazan, Mustafa b. Ramazan, Mustafa b. İlyas ve gayruhüm.