İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 387 Hüküm no: 387 Orijinal metin no: [101a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Ali’nin vefat eden Mekke kadısı Muharremzâde Abdullah Efendi’ye kendisinin mülâzemeti için verdiği parayı vârislerinden talep etmesi ile ilgili davada tarafların anlaştığı Vilâyet-i Anadolu’da Alâiye kasabası ahâlîsinden Süleyman Efendi b. Ali nâm kimesne meclis-i şer‘-i şerîfde bundan akdem Mekke-i mükerreme kadısı iken vefât eden merhûm Abdullah Efendi b. el-merhûm Muharremzâde Ahmed Efendi’nin verâseti, zevce-i metrûkesi Sâliha bt. Mehmed Efendi nâm hâtun ile li ebeveyn karındaşı mefharü’l-müderrisînü’l-kirâm Şeyh Mehmed Efendi’ye münhasıra olup ba‘dehu mezbûre Sâliha Hâtun dahi vefât edip verâseti, li ebeveyn er karındaşı Ahmed Efendi’ye münhasıra olduğu sâbit oldukdan sonra merhûm-ı mezbûr Abdullah Efendi’nin terekesine vâzı‘ü’l-yed olan bâ‘is-i hâze’l-kitâb mûmâ-ileyh Şeyh Mehmed Efendi mahzarında ikrâr ve takrîr-i kelâm edip merhûm-ı mezbûr Abdullah Efendi hayâtında Mekke-i mükerreme kadısı oldukda bir mülâzemet husûsu için iki yüz esedî guruşu mûmâ-ileyh Abdullah Efendi’ye def‘ ve teslîm ol dahi ahz u kabz ve istihlâk ettiğinden sonra husûs-ı mezbûrun husûlü dahi müyesser olmadığından mâ‘adâ meblağ-ı mezbûr merhûm-ı mezbûr zimmetinde kalmağla bundan akdem meblağ-ı mezbûru merhûm-ı mezbûrun terekesine vâzı‘ü’l-yed olan mûmâ-ileyh Şeyh Mehmed Efendi yedinden taleb ve da‘vâ eylediğimde, ol dahi inkâr etmekle beynimizde ba‘de’n-nizâ‘ muslihûn tavassut edip mûmâ-ileyh Şeyh Mehmed Efendi ile beynimizde seksen [guruş] üzerine inşâ-i akd-i sulh [101b] ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr seksen guruşu mûmâ-ileyh Şeyh Mehmed Efendi yedinden ahz u kabz ettiğimden sonra husûs-ı mezbûra müte‘allika âmme-i de‘âvâdan ancak mûmâ-ileyh Şeyh Mehmed Efendi’nin zimmetini ibrâ-i âmm-ı kātı‘ü’l-hısâm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Fahrü’l-müderrisîn Muttalibzâde Mehmed Sâlih Efendi, es-Seyyid Yusuf Efendi b. Mahmud, İbrahim Efendi b. Süleyman, Derviş Mehmed Efendi, es-Seyyid Muharrem Efendi b. es-Seyyid İsmail, Müftîzâde eş-Şeyh Mehmed Efendi, Abdurrahman Efendi b. Hüseyin.