İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 388 Hüküm no: 388 Orijinal metin no: [101b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdullah’ın beytülmâle kalan gemisini haksız yere zabtettiği iddiasıyla ortağı Mehmed Reis aleyhine açılan davada iddianın ispatlanamadığı Mahmiye-i İstanbul’da Dergâh-ı âlî yeniçerileri beytülmâl emîni olan fahrü’l-akrân Mustafa Ağa meclis-i şer‘-i şerîfde sefîne reislerinden râfi‘-i hâze’l-kitâb Mehmed Reis b. el-Hâc İlyas nâm kimesne mahzarında üzerine da‘vâ ve takrîr-i kelâm edip Dergâh-ı âlî yeniçerilerinden olup mahmiye-i mezbûrede Cerrâhpaşa câmi‘i kurbunda Hacı Ahmed mahallesinde sâkin iken bundan akdem bilâ-vâris vefât edip terekesi beytülmâle âid olan Mustafa Beşe b. Abdullah’ın terekesinden çenber ta‘bîr olunur bir sefîneye mezbûr Mehmed Reis bi gayri hakkın vaz‘-ı yed etmekle hâlâ mezbûr Mehmed Reis’e suâl olunup sefîne-i mezbûreyi bana teslîme tenbîh olunmak matlûbumdur dedikde gıbbe’s-suâl mezbûr Mehmed Reis cevâbında zikr olunan sefîneye vaz‘-ı yedini ve sefîne-i mezkûrenin beş sehimden iki sehimi müteveffâ-yı mezbûrun terekesinden olduğunu ikrâr, üç sehimi benim mülkümdür deyip müteveffâ-yı mezbûrun terekesinden olduğunu inkâr etmeğin müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Mehmed Reis’e zikr olunan sefînenin beş sehimden üç sehimi dahi kendi mülkü olup müteveffâ-yı mezbûrun terekesinden olmadığına yemîn teklîf olundukda. ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine ber vech-i muharrer mu‘ârazadan men‘ olup mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Hasan b. Hüseyin, Mehmed b. Mustafa, Mustafa b. Ahmed, Mustafa b. İbrahim, Hüseyin b. Ahmed, Ali b. Ahmed. İbrahim b. Ahmed.