İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 389 Hüküm no: 389 Orijinal metin no: [101b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdullah’ın beytülmâle kalan gemisinde hissesi olan Mustafa Reis’in gemiyi haksız yere zabtetmediği, hissesinin geçerli olduğu Mahmiye-i İstanbul’da Dergâh-ı âlî yeniçerileri beytülmâl emîni olan fahrü’l-akrân Mustafa Ağa meclis-i şer‘-i şerîfde sefîne reislerinden râfi‘ü’l-kitâb Mustafa Reis b. el-Hâc Ali nâm kimesne mahzarında üzerine da‘vâ ve takrîr-i kelâm edip Dergâh-ı âlî yeniçerilerinden olup mahmiye-i mezbûrede Cerrâhpaşa câmi‘-i şerîfi kurbunda el-Hâc Ahmed mahallesinde sâkin iken bundan akdem bilâ-vâris vefât edip terekesi beytülmâla âid olan Mustafa Beşe b. Abdullah’ın terekesinden çenber ta‘bîr olunur bir sefînesine mezbûr Mustafa Reis bi gayri hakkın vaz‘-ı yed etmekle hâlâ mezbûr Mustafa Reis’e suâl olunup sefîne-i mezbûreyi bana teslîme tenbîh olunmak matlûbumdur dedikde gıbbe’s-suâl mezbûr Mustafa Reis cevâbında fi’l-hakīka zikr olunan sefîneye vaz‘-ı yedini ve sefîne-i mezkûrenin sekiz sehimden [102a] bir buçuk sehimi müteveffâ-yı mezbûrun terekesinden olduğunu ikrâr, altı buçuk sehimi benim mülkümdür deyip müteveffâ-yı mezbûrun terekesinden olduğunu inkâr etmeğin müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin zikr olunan sefînenin sekiz sehimden altı buçuk sehimi dahi kendi mülkü olup müteveffâ-yı mezbûrun terekesinden olmadığına mezbûr Mustafa Reis’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine ber vech-i muharrer mu‘ârazadan men‘ olup mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Mehmed b. İlyas, İbrahim Çelebi b. Ahmed, Ali Reis b. İbrahim, Hüseyin Reis b. Ahmed ve gayruhüm.