İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 390 Hüküm no: 390 Orijinal metin no: [102a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. İsrafil’in İstanköy adasında vefat eden Nasûh Beşe’nin vârisi olduğu ve beytülmâl emininin el koyduğu parasının ona teslimi Vilâyet-i Anadolu’da Kastamonu sancağında Hoşalay kazâsına tâbi‘ Ağrana nâm karye ahâlîsinden olup Akdeniz’de vâki‘ İstanköy Adası’nda misâfiren vefât eden Nasûh Beşe b. İsrafil nâm kimesnenin li ebeveyn karındaşı ve hasren vârisi olan bâ‘is-i hâze’l-vesîka Yusuf nâm kimesne meclis-i şer‘-i şerîf-i enverde hâlâ yeniçeri beytülmâl emîni olan Mustafa Ağa müteveffâ-yı mezbûrun bi’l-emâne elli esedî guruşuna vaz‘-ı yed etmeğin suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Mustafa Ağa müteveffâ-yı mezbûrun ber vech-i muharrer elli esedî guruşuna vâzı‘ü’l-[yed] olduğunu ikrâr, lâkin müdde‘î-i mezbûrun vech-i muharrer üzre verâsetini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup kazâ-i mezbûra tâbi‘ Kağaz nâm karye ahâlîsinden olup hâlâ mahmiye-i İstanbul’da Hâce Hâtun mahallesi sükkânından İbrahim Beşe b. Ali ve Resûl b. Ali ve Şaban b. Mehmed nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müdde‘î-i mezbûr Yusuf müteveffâ-yı mezbûr Nasûh Beşe’nin li ebeveyn karındaşı ve hasren vârisi olup babaları ismi mezbûr İsrafil ve dedeleri ismi Deli Durali ve vâlideleri ismi Hamine ve maskat-ı re’sleri zikr olunan Ağrana nâm karyedir müteveffâ-yı mezbûrun verâseti mezbûr Yusuf’a münhasıradır gayr vârisi ve terekesine müstahıkk-ı âhar olduğu ma‘lûmumuz değildir hâlâ mezbûr Yusuf için müteveffâ-yı mezbûrun terekesini vâzı‘ü’l-yed olanlardan hakk-ı taleb ve ahz var[d]ır biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükmi’ş-şer‘î ber vech-i muharrer makbûzu olan meblağ-ı mezbûr elli esedî guruşu müdde‘î-i mezbûr Yusuf’a def‘ ve teslîme mezbûr Mustafa Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Abdurrahman b. Hüseyin, Yusuf b. Mustafa, Fethullah b. Mustafa, Du[r]muş b. Receb, Receb b. Kalender, Mehmed Beşe b. Bekir ve gayruhüm mine’l-hâzırîn.