İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 390 Hüküm no: 391 Orijinal metin no: [102b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mehmed’e evinde vefat eden Mehmed’in vârislerinin evden aldıkları eşya hususundaki davasını ispatlamak için süre verildiği Medîne-i Hazret-i Ebâ Eyyûb-i Ensârî mahallâtından Servi mahallesi sâkinlerinden Ali Beşe b. Mehmed nâm kimesne meclis-i şer‘-i şerîfde Ahmed Bey b. Bayram nâm kimesne mahzarında üzerine da‘vâ ve takrîr-i kelâm edip mezbûr Ahmed Bey’in li ebeveyn karındaşı olan Mehmed nâm kimesne benim menzilimde fevt olmağla terekesinden olmak zu‘muyla ben ordu-yı hümâyûnda iken eşyâ-i memlûkemden bir üsküf ve bir sîm kılıç ve bir cevâhir habbeli sîm bıçak ve bir kırmızı boğça ve bir Konevî serhaddî ve bir mürre kaftan ve bir mor kürk ve bir Bağdâdî kerrâke ve bir leğen ve bir kahve tepsimi fuzûlen ahz u kabz eylemişdir hâlâ mezbûr Ahmed Bey’e suâl olunup eşyâ-i mezkûre mevcûd ise a‘yânını müstehleke ise kıymet-i şer‘iyyelerini bana teslîme tenbîh olunmak matlûbumdur dedikde gıbbe’s-suâl mezbûr Ahmed Bey cevâbında müdde‘î-i mezbûr Ali Beşe zikr olunan eşyâ karındaşım müteveffâ-yı mezbûrun terekesinden olmak üzre bana kendi rızâsıyla def‘ ve teslîm ben dahi kabz ve tesellüm etmiş idim deyû def‘ ile mukābele edicek gıbbe’l-istintâk ve’l-inkâr mezbûr Ahmed Bey’den def‘-i mezbûrunu mübeyyine beyyine taleb olundukda ityân-ı beyyine için istimhâl etmekle mehl-i şer‘î ile imhâl olunmağın mâ vaka‘a bi’t-taleb ketb olundu. Fi’l-yevmi’s-sâdis aşer min Saferi’l-hayr li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Mahmud Çelebi b. İsmail, Osman Çelebi b. Ömer, Hüseyin b. Mehmed, Ebûbekir b. Hüseyin.