İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 391 Hüküm no: 392 Orijinal metin no: [102b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Beşe b. Hasan’ın Hüseyin Beşe b. Bahşâyiş’te siyah üzüm bedelinden alacağı olduğu Mahmiye-i İstanbul’da Draman mahallesinde sâkin Süleyman Beşe b. Hasan nâm kimesne meclis-i şer‘-i şerîf-i enverde Hüseyin Beşe b. Bahşâyiş nâm kimesne mahzarında üzerine da‘vâ ve takrîr-i kelâm edip mukaddemâ yedimden iştirâ ve kabz eylediği beynimizde ma‘lûm siyah üzüm semeninden mezbûr Hüseyin Beşe zimmetinde otuz altı esedî guruş hakkım kalmışdı hâlâ suâl olunup meblağ-ı mezbûr otuz altı esedî guruşu bana edâ ve teslîme mezbûr Hüseyin Beşe’ye tenbîh olunmak matlûbumdur dedikde gıbbe’s-suâl mezbûr Hüseyin Beşe cevâbında fi’l-vâki‘ kaziyye minvâl-i muharrer üzre olup müdde‘î-i mezbûra mârrü’z-zikr olan üzüm semeninden otuz altı esedî guruş zimmetinde deyni olduğunu bi tav‘ihî ikrâr ve i‘tirâf etmeğin mûcebince meblağ-ı mezbûr otuz altı esedî guruş müdde‘î-i mezbûr Süleyman Beşe’ye edâ ve teslîme mezbûr Hüseyin Beşe’ye tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Mehmed b. Ahmed, Yahya Çelebi b. Mehmed, Mustafa b. Hüseyin, Sefer Çelebi kethüdâ ve gayruhüm mine’l-hâzırîn.