İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 392 Hüküm no: 393 Orijinal metin no: [102b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Abdullah’ın Kerime’de olan alacağının kefili olan Mustafa Çelebi b. İsmail’den tahsili Mahmiye-i İstanbul’da Uzun Yusuf mahallesi sâkinelerinden bâ‘isetü hâze’l-kitâb Emine bt. Abdullah nâm hâtun meclis-i şer‘-i şerîfde Mustafa Çelebi b. İsmail nâm kimesne mahzarında üzerine da‘vâ ve takrîr-i kelâm edip bundan akdem gāibe ani’l-meclis Kerime nâm hâtun zimmetinde beynimizde ma‘lûm eşyâ semeninden yetmiş sekiz guruş hakkım olup meblağ-ı mezbûru mezbûre Kerime’den taleb eylediğimde, mezbûr Mustafa Çelebi meblağ-ı mezbûra [103a] tarafeynden emir ve kabûlü hâviye kefâlet ile kefîl olmuşdu hâlâ mezbûr Mustafa Çelebi’ye suâl olunup meblağ-ı mezbûru kefâletine binâen bana edâ ve teslîme tenbîh olunmak matlûbumdur dedikde gıbbe’s-suâl mezbûr Mustafa Çelebi cevâbında kaziyye minvâl-i muharrer üzre olup mezbûre Kerime’nin zimmetinde müdde‘î-i mezbûra ber vech-i muharrer deyni olan meblağ-ı mezbûr yetmiş sekiz guruşa vech-i muharrer üzre kefîl olduğunu ikrâr ve i‘tirâf etmeğin mûcebince meblağ-ı mezbûr yetmiş sekiz guruşu kefâletine binâen müdde‘î-i mezbûra edâ ve teslîme mezbûr Mustafa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Mehmed Çelebi b. Abdullah, Mehmed Beşe el-Mübâşir, Abdi Beşe b. İbrahim, Davud Beşe b. Abdullah, Mustafa b. Abdullah, İbrahim Çelebi b. Ahmed ve gayruhüm.