İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 392 Hüküm no: 394 Orijinal metin no: [103a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleymaniye İmâreti Ekmekçibaşı Süleyman Beşe b. Kurd’un Alacahamam’daki dükkânının kiracısı Çalo v. Kiçi’den alacağının tamamını tahsil ettiği Mahmiye-i İstanbul’da Süleymaniye İmâreti’nde hâlâ ekmekçibaşı olan Süleyman Beşe b. Kurd nâm kimesne meclis-i şer‘-i şerîfde bâ‘is-i hâze’s-sifr Çalo v. Kiçi nâm zimmî muvâcehesinde ikrâr-ı tâm ve takrîr-i kelâm edip silk-i mülkümde münselik olup mahmiye-i mezbûrede Alacahamam kurbunda vâki‘ lede’l-ahâlî ma‘lûmü’l-hudûd tavukçu dükkânımı, târih-i kitâbdan on bir sene mukaddem yevmî beş akçeye olmak üzre mezbûr Çalo’ya îcâr ve teslîm ol dahi vech-i muharrer üzre istîcâr ve tesellüm edip dükkân-ı mezbûra on bir sene mutasarrıf olmağın hâlâ dükkân-ı mezbûr ücretinden ber vech-i muharrer on bir senede müctemi‘ olan on dokuz bin sekiz yüz akçeyi mezbûr Çalo yedinden tamâmen ahz u kabz edip min ba‘d zikr olunan dükkân ücretinden mezbûr Çalo zimmetinde bir akçe ve bir habbe hakkım bâkī kalmadı dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mustafa Beşe b. ( ) kethüdâ, İlyas Beşe b. ( ), Sinan Beşe b. Mehmed, Ahmed Beşe b. Cafer, Hüseyin Beşe b. Mustafa, İbrahim Çelebi b. Ahmed, Ozfor v. Dido, Çöle v. Tevad?