İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 393 Hüküm no: 395 Orijinal metin no: [103a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Ağa b. Abdülvehhâb’ın Ereğli mahallesindeki evini Osman Ağa b. Süleyman’a sattığı Mahmiye-i İstanbul’da Ereğli mahallesi sâkinlerinden Ömer Ağa b. Abdülvahhab nâm kimesne meclis-i şer‘-i şerîfde bâ‘is-i hâze’l-kitâb Osman Ağa b. Süleyman nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Hoca Mehmed Efendi vakfı ve bir tarafdan ba‘zan Mümine Hâtun vakfı ve ba‘zan İbrahim Ağa mülkü ve bir tarafdan Abdülbâkī veresesi mülkleri ve bir tarafdan tarîk-i âm ile mahdûd hâriciyyesinde bir bâb fevkānî oda ve bir sofa ve bir tahtânî oda ve bir ahır ve bir kenîf ve bir su kuyusu ve cüneyneyi müştemil menzilimi, bi cümleti’t-tevâbi‘ ve’l-levâhık altı yüz seksen esedî guruşa merkūm Osman Ağa’ya tarafeynden îcâb ve kabûlü hâvî bey‘-i kat‘î ile bey‘ ve teslîm ol dahi iştirâ ve tesellüm ettikden sonra semen-i mezbûr [103b] altı yüz seksen guruşu bana edâ ve teslîm ben dahi tamâmen ahz u kabz eyledim ba‘de’l-yevm menzil-i mahdûd-ı mezbûr merkūm Osman Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î ve’t-tahkīki’l-mer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ahmed Çelebi b. Ali, Ali Bey b. Halil, Zülfikār Beşe b. Ali, Abdi Çelebi b. Ebûbekir, Ali b. Mustafa ve gayruhüm.