İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 393 Hüküm no: 396 Orijinal metin no: [103b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âsiye bt. Veli’nin Aydın Kethüdâ mahallesindeki evini Ümmühâni bt. Veli’ye sattığı Mahmiye-i İstanbul’da Aydın Kethüdâ mahallesi sâkinelerinden olup zâtı ma‘rifet-i şer‘iyye ile ârifân mahalle-i mezbûre sükkânından Abdullah b. Mahmud ve Mehmed Çelebi b. Veli nâm kimesneler ta‘rîfleri ile mu‘arrefe olan Âsiye bt. Veli nâm hâtun meclis-i şer‘-i şerîfde bâ‘isetü hâze’l-kitâb Ümmühâni bt. Veli nâm hâtun mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ iki tarafdan Hamza Paşa oğulları mülkleri ve bir tarafdan Ali Beşe mülkü ve bir tarafdan tarîk-i âm ile mahdûd tahtânî bir bâb oda ve bir sofa ve bir bi’r-i mâ ve kenîf ve cüneyneyi müştemil mülk menzilimi, tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile seksen esedî guruşa mezbûre Ümmühâni Hâtun’a bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr seksen esedî guruşu mezbûre Ümmühâni yedinden bi’t-tamâm ahz u kabz eyledim ba‘de’l-yevm menzil-i mahdûd-ı mezbûr merkūme Ümmühâni Hâtun’un mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mustafa Efendi b. Ramazan el-İmâm, Mustafa Efendi imâm-ı Davudpaşa, Mehmed Efendi b. Mahmud, Mehmed Bey b. Mahmud, Mehmed Çelebi b. Veli, Osman b. Abdullah, Bayram Efendi el-Müezzin.