İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 394 Hüküm no: 397 Orijinal metin no: [103b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mustafa’nın Keçeci Pîrî mahallesindeki ev hissesini Hüseyin Beşe’ye sattığı Mahmiye-i İstanbul’da Keçeci Pîrî mahallesi sâkinelerinden iken bundan akdem vefât eden Emine bt. Abdi Bey nâm hâtunun verâseti, sadrî oğulları Ahmed Ağa ve Mehmed ibney Mustafa nâm kimesnelere münhasıra olup ba‘dehâ mezbûr Mehmed fevt olup verâseti, sulbî oğlu Hüseyin Beşe nâm kimesneye münhasıra olduğu şer‘an sâbit ve mütehakkik oldukdan sonra mezbûr Ahmed Ağa meclis-i şer‘-i şerîfde bâ‘is-i hâze’l-kitâb mezbûr Hüseyin Beşe mahzarında ikrâr ve takrîr-i kelâm edip müteveffâ-yı mezbûre Emine’den bana intikāl eden mahalle-i mezbûrede vâki‘ bir tarafdan umdetü’l-ulemâ’i’l-izâm Abdülhalim Efendi menzili ve bir tarafdan Gündüzcüoğlu Derviş Çelebi menzili ve bir tarafdan vakfım olan menzil ve bir tarafdan tarîk-i âm ile mahdûd iki bâb oda ve bir sofa ve bir su kuyusu [104a] ve zât-ı eşcâr hadîka ve havluyu müştemil mülk menzilde hisse-i şer‘iyyem olan nısf-ı şâyi‘ini, bi cümleti’t-tevâbi‘ ve’l-levâhık ve cemî‘i’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i sahîh-i şer‘î ile yüz elli esedî guruşa mezbûr Hüseyin Beşe’ye bey‘ ve teslîm ol dahi iştirâ ve tesellüm ve kabûl ettiğinden sonra semeni olan meblağ-ı mezbûr yüz elli esedî guruşu müşterî-i merkūm Hüseyin Beşe bana edâ ve teslîm ben dahi yedinden tamâmen ahz u kabz eyledim ba‘de’l-yevm mârrü’z-zikr olan menzil-i mahdûdun nısf-ı şâyi‘i mezbûr Hüseyin Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İmâm Mehmed Efendi b. Yusuf, Müezzin Mehmed Efendi b. Mustafa, Mustafa b. Ömer, Kasım Çelebi b. Nasûh, İsmail Çelebi b. Hüseyin, Ali Efendi b. Süleyman.