İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 395 Hüküm no: 399 Orijinal metin no: [104b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâtib Bakī Vakfı’nın eski mütevellisi Mehmed Çelebi b. Abdullah’ın dönemine ait muhasebesinin görülüp zimmetinin ibrâ edildiği Hâzihî hücceti kethüdâi muhzırûn mümzâ be imzâi Efendi. Mahmiye-i İstanbul’da Koska fırını kurbunda Kızıltaş mahallesi sâkinlerinden olup merhûm Kâtib Bâkī vakfına bi’l-fi‘l mütevellî olan Mehmed Efendi b. Mustafa nâm kimesne meclis-i şer‘-i şerîfde vakf-ı mezbûra sâbık mütevellî olan râfi‘-i hâze’l-kitâb Mehmed Çelebi b. Abdullah nâm kimesne mahzarında ikrâr ve takrîr-i kelâm edip merkūm Mehmed Çelebi tevliyyet-i mezbûreden azl olunup muhâsebesi görüldükde, yedine verilen defter-i muhâsebe[de] nâtık olduğu üzre mâl-ı vakf-ı mezbûrdan her biri yüz yirmi akçeye olmak üzre makbûzu olan dört yük otuz beş bin yüz yirmi akçe hesâbınca üç bin altı yüz yirmi altı guruşu ve her biri yüz akçeye olmak üzre makbûzu olan sekiz yüz doksan üç guruşun üç yüz bir guruşunu bana def‘ ve teslîm ve beş yüz doksan iki guruşunun üç yüz altmış guruş Havvâ nâm hâtun zimmetinde olup ve on iki guruşu vâkıf-ı mezbûrun câmi‘inde müezzin olan Ali Çelebi zimmetinde olup ve iki yüz guruşu Karanfil nâm zimmî zimmetinde ve yirmi guruşu Mustafa Ağa zimmetinde olmağla beni mezbûrân Havvâ ve Ali Çelebi ve Karanfil ve Mustafa Ağa üzerlerine havâle-i sahîha-i şer‘iyye ile havâle edip ben dahi meblağ-ı mezbûr üç bin altı yüz yirmi altı guruşu ve meblağ-ı mezkûr üç yüz bir guruş, cem‘an üç bin dokuz yüz yirmi yedi guruşu kabz ve tesellüm ve havâle-i mezbûreyi kabûl eyledim. Min ba‘d meblağ-ı mezbûr üç bin dokuz yüz yirmi yedi guruş ve mezbûrûn Havvâ ve Ali Çelebi ve Karanfil ve Mustafa Ağa zimmetlerinde olan beş yüz doksan iki guruş, cem‘an dört bin beş yüz on dokuz guruşdan merkūm Mehmed Çelebi yedinde bir akçe ve bir habbe bâkī kalmadı dedikde gıbbe’t-tasdîki’ş-şer‘î ve’t-tahkīki’l-mer‘î, mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Fahrü’s-sâlikîn Mu‘abbir Şeyh Hasan Efendi, el-Hâc Halil b. ( ) mu‘temed-i vakf-ı mezbûr, Mehmed Efendi b. Mahmud imâm-ı Şeyh, Yusuf Efendi b. Abdünnebi imâm-ı Nevbahâr, Mehmed Çelebi b. Mustafa, Şaban Efendi b. Abdurrahman el-İmâm, Ali Çelebi b. Mustafa el-Müezzin, Mustafa Çelebi b. Abdurrahman, Mehmed Çelebi b. Abdülaziz, el-Hâc Halil b. Nasrullah, el-Hâc Yusuf b. Abdullah, Hasan Çelebi b. Abdullah, Receb Çelebi b. Mehmed, Musa Efendi b. Mustafa, es-Seyyid Muharrem Efendi b. İsmail, es-Seyyid Abdülmu‘tî b. Abdülkerim, Hamamcızâde Mehmed Çelebi, Pîr Mehmed Çelebi b. Ali, Ahmed Çelebi b. ( ), Mustafa Çelebi b. ( ), İsmail Çelebi b. Murad, Receb b. Murad ve gayruhüm.