İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 396 Hüküm no: 400 Orijinal metin no: [105a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mehmed’in evini bey‘ bi’l-istiğlâl yoluyla Ahmed Çavuş Vakfı’na sattığı Mahmiye-i İstanbul’da Karagümrük kurbundan Ali Paşa-yı Atîk mahallesinde sâkin Mehmed Efendi b. Mehmed meclis-i şer‘-i şerîfde takrîr-i kelâm ve ta‘bîr ani’l-merâm edip yedimde mülküm olup mahalle-i mezbûrede vâki‘ bir tarafdan Ömer Efendi mülkü ve bir tarafdan mahalle-i mezbûre imâmına meşrût vakıf menzil ve bir tarafdan bahçe ve bir tarafdan tarîk-i âm ile mahdûd menzilimi, bi cümleti’t-tevâbi‘ ve’l-levâhık hâlâ merhûm Ahmed Çavuş vakfına meşrûtiyyet üzre mütevellî olan bâ‘is-i hâze’l-kitâb İbrahim Efendi b. eş-Şeyh Yahya nâm kimesneye yüz elli kıt‘a esedî guruşa bi tarîki’l-istiğlâl bey‘ ve teslîm ol dahi ber vech-i muharrer iştirâ ve tesellüm ve semen-i mezbûru bana edâ ve teslîm ben dahi ahz u kabz ettiğimden sonra mütevellî-i merkūm İbrahim Efendi menzil-i mahdûd-ı merkūmu gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan iki sene tamâmına değin senede yirmi ikişer buçuk guruşa olmak üzre kırk beş guruşa bana îcâr ve teslîm ben dahi istîcâr ve tesellüm eyledim dedikde mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Abdullah Çelebi b. el-mevlâ el-merhûm Müderriszâde Mehmed Efendi, Mehmed Çelebi b. Ali, Mustafa Çelebi b. Mehmed, Mehmed Efendi b. Osman, Mustafa b. Mehmed, el-Hâc Mahmud, el-Hâc Siyavuş b. Abdullah, Ali Beşe b. ( ) Çukadâr ve gayruhüm.