İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 397 Hüküm no: 401 Orijinal metin no: [105a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’nın Keçeci Pîrî mahallesindeki evini damadı Hüseyin Beşe b. Pîrî’ye sattığı Mahmiye-i İstanbul’da Keçeci Pîrî mahallesinden sâkine Fâtıma bt. Mustafa nâm hâtunun li ebeveyn kız karındaşı oğlu ve tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân zevci Ali Çelebi b. Mehmed ve kazzâz Mehmed Çelebi b. Osman nâm kimesneler şehâdetleriyle şer‘an sâbit olan Mustafa Çelebi b. Mehmed nâm kimesne meclis-i şer‘-i şerîfde müvekkilem mezbûrenin dâmâdı bâ‘is-i hâze’l-kitâb Hüseyin Beşe b. Pîrî mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma Hâtun yedinde mülkü olup mahalle-i mezbûrede vâki‘ bir tarafdan Sultan Hâtun mülkü ve bir tarafdan tarîk-i âm ve bir tarafdan ba‘zan Andriye nâm zimmî bahçesi ve ba‘zan Keserci nâm zimmî bahçesi ve bir tarafdan ba‘zan Fâtıma bt. Veli nâm hâtun mülkü ve Andriye bahçesi ve tarîk-i âm tarafından vâki‘ fevkānî iki bâb oda ve bir sofa ve tahtânî bir ahır ve bir kenîf ve zât-ı eşcâr bahçe ve sokak kapısını müştemil menzilini ifrâz ve alâmet-i fâsıla vaz‘ ettiğinden sonra cemî‘ tevâbi‘ ve levâhıkıyla dâmâdı mezbûr Hüseyin Beşe’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile yirmi bir bin akçeye bey‘ ve teslîm ol dahi ber vech-i muharrer iştirâ ve kabûl ve tesellüm ettiğinden sonra semeni olan meblağ-ı mezbûr yirmi bir bin akçeyi mezbûr Hüseyin Beşe yedinden tamâmen ahz u kabz eyledi ba‘de’l-yevm menzil-i mahdûd-ı mezkûrun nısfı olup bâlâda tafsîli mürûr eden iki bâb oda ve bir ahır ve bir kenîf ve bahçe ve sokak [105b] kapısı mezbûr Hüseyin Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. Yusuf el-İmâm, Mehmed Çelebi b. Mustafa el-Müezzin, Mustafa b. Ömer el-Kayyım, Mehmed Efendi b. Mehmed, Kıran Mehmed Çelebi b. Osman, Ali Çelebi b. Mehmed, Hüseyin Efendi b. İbrahim, Abdurrahman Çelebi b. Mustafa Efendi ve gayruhüm mine’l-hâzırîn.