İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 398 Hüküm no: 402 Orijinal metin no: [105b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa’nın borcuna kefil olan Abraham v. Andriye Papas’ın üzerine düşen kısmını ödemesi gerektiği Mahmiye-i İstanbul’da Mehterhâne’de birinci odada mevkūfe nukūda bi’l-fi‘l mütevellî Musa Beşe b. İbrahim nâm kimesne meclis-i şer‘-i şerîfde Abraham v. Andriye Papas mahzarında üzerine da‘vâ ve takrîr-i kelâm edip bin seksen altı senesi Recebi gurresinde yedinde olan mâl-ı vakf-ı mezbûrdan bin esedî guruş Ahmed Ağa nâm [kimesneye] idâne ve teslîm ol dahi istidâne ve tesellüm ettiğinden sonra meblağ-ı mezbûra mezbûr Abraham ile Hasan Çelebi nâm kimesne ve Papasoğlu Kazar nâm zimmî tarafından emir ve kabûlü hâviye kefâlet ile kefîl olmuşlar idi mezbûr Abraham’a suâl olunup kefâlet-i mezkûresine binâen meblağ-ı mezbûr bin guruşdan üzerine edâsı lâzım gelen üç yüz otuz üç guruş bir sülüsü bana edâ ve teslîme tenbîh olunmak matlûbumdur dedikde gıbbe’s-suâl mezbûr Abraham cevâbında kaziyye minvâl-i muharrer üzre olup mezbûr Ahmed Ağa’nın müdde‘î-i mezbûr yedinden istidâne ve kabz eylediği meblağ-ı mezbûr bin guruşa mezbûrân Hasan Çelebi ve Kazar ile ma‘an ber vech-i muharrer kefîl olduğunu ikrâr ve i‘tirâf etmeğin mûcebince kefâletine binâen meblağ-ı mezbûr bin guruşdan üzerine edâsı lâzım gelen üç yüz otuz üç guruş bir sülüsü müdde‘î-i mezbûre edâ ve teslîme mezbûr Abraham’a tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: İbrahim Çavuş b. Abdülkerim, İbrahim Çelebi b. Mehmed, Ahmed Beşe b. Abdullah, Hüseyin b. Abdullah, Veli b. Abdullah, Mehmed b. Abdullah ve gayruhüm.